Meschain wait je t al omdat t joen grode belangstellen het: over elke dag is wat biezunders te melden of vaalt dij in n themoaweek. Zo was t guster (18 maai) plantendag en was 19 maai (1944) de dag dat 245 Sinti en Roma vanuut Westerbörk noar Auschwitz-Birkenau deporteerd wuiren, woarvan datteg d’oorlog overleefden.

Wellicht interesseert joe dat leste wel en vaalt t eerste bie joe onder nutteloze infermoatsie. Wat kin t joe nou schelen dat ter aargens in de wereld op n bepoalde dag van t joar n knarrie ridderd is. Mor der bestaait inderdoad n echte nutteloze faaiten kelender mit n overzicht van alle themoadoagen en – weken.

Nou is t mor net op welke kelender je kieken. Nait op elke kelender staait dat t guster de dag van t schoap was en dat vannacht d’heksenjacht vierd wordt. Dus as je vannacht aine op n bezzem rondom joen huus vlaigen zain din wait je nou woarom. Wellicht heur je in t baalke duuster wel aine roupen: “k Versweer God en aal zien hillegen”. Even loater vuil je din n zoeze wind en heur je in de verte nog net gaalmen: “Over heeg over steeg, over laand over zaand, op weg noar t Hogelaand.”

Toch binnen der ook nuttege doagen en weken. Dizze weke is t de week van d’opvouden. Kiek, doar kin je vast wat mit. Of je kinnen wel aine dij nog n drokkertje in de goie richten bruken kin. Ik zag lestdoags nog n moeke dij heur antam al 10 moal dudelk moakt haar dat e nait luusterde. En dou t rötjong ondanks t elfde rabbelement in n plazze ston te dansen heurde ik moeke zeggen: “Kijk dat bedoel ik nou als ik zeg dat je niet luistert.”

Nou ja, mörgen is t Annie M.G. Schmidt-dag. Doar stoan vast nog wel wat verhoaltjes in woar dij moeke wat mit kin. Zai komt mit heur opvouden nait ver as ze aan heur grom vertelt dat op 19 maai 1972 Ajax mit 12-1 van Vitesse won, wat de grootste zege ooit in d’Eredivizie is.

Mörgen is t 20 maai. Op dij dag in 2006 won Finland de finoale van t 51ste Euroviziesongfestival. Je waiten vast nog wel de noam van de winnoar.

Lordi…….. Hard Rock Hallelujah……..