“Hest t al lezen? t Virtuele univerzum komt ter aan. Òfkört: VR oftewel virtual reality.”
Buurman Jan glom as n ekkel tiedens t uurspreken van dizze stoere woorden. Ik schonk stilswiegend n kop kovvie in, omreden buurman Jan zat ja toch op zien proatstoule.
“Alles mout tegenwoordeg in t Engels. As je dat nait doun heur je der nait meer bie. n Gewone fietsemoaker is der nait meer. Dij nuim je bike-expert. En bie n normoale eerzoame bakker komt gain mìns meer in de winkel. Dij mout minstens patissier of banquettemanager op zien toko stoan hebben. As je waarken bie n rekreoatsiepaark as assistent van n dieverdoatsiebegelaaider din hait dat nou ‘leisure & hospitality assistent’. En din netuurlek wel indoor en outdoor. Je mouten ja mitgoan mit de tied. Nou, ik hol t gewoon bie t Grunnegs. Man, lu waiten van gekkeghaid ja nait meer wat ze uutspoken. Waist wel hou ze nou n speltherapeut nuimen veur oldjes zo as wie? n Longevity coach. Dat het volgens mie niks mit swaaien op meziek mit houpels en knotsen van doun. Nee, dij verspraaidt kennis over gezond en vitoal older worden. Dij moakt ons bewust van gezonde eterij, bewegen en n aandere laifstail.”
Dat leste kwam der wat krampachteg uut, mor buurman Jan was nait te stoppen.
“Nou ik zit nait te wachten op kwakdeuzen. Dammeet dolen der aal meer lu rond dij de wereld veur n doedelzak aankieken. En dat in n tied dat veul lu nait ains kloarkommen mit de dag van vandoage en mörgen. Wie worden overaal in de goaten holden en wie worden digitoal overaal volgd. Stel die toch ais veur dat ik op n dag, noa n intiem virtueel erotisch gebeuren in mien aigen huus, deur t winkelsentrum loop en plotsklaps uut n luudspreker heur:
Wil je het erotisch avontuur van gisteravond nogmaals in het echt beleven buurman Jan, druk dan hier op de tepelbel van Kimberley’s Bodyworld.
Wat n schoamte, elk kin dat din heuren. Nee, ik heb mien Griet verboden om n dildo of zokswat te kopen of te bestellen. Ik heb wat lözze onderdailtjes bie AliExpress besteld en goa dammeet zulf aan t figelaaiern. Even n dag of wat knutern op beune en ik heb n trilaaichie of zokswat kloar. Gainaine dij dat din wait. Behaalve mien Griet netuurlek. Ik zeg die dit: echt en nep lopen dammeet kompleet deur mekoar hìn.”
Buurman Jan stapde op. Hai ging aan t knutern op beune om te perbaaiern zien Griet te bevredegen mit n zulfgeknuterde kreoatsie. Tja, meschain ontpopt buurman Jan zok wel as ‘developer’ van n suksesnummer.
Dij mout din wel via digi toal bestuurboar wezen vanzulf…..
“Lekker, man. Der gaait niks boven n homstok Grunneger kouke dij je zunder mörfflittertje bie n lekkere kop kovvie opeten kinnen.”
“n Mörfflittertje, wat mag dat din wel wezen?” vruig ik.
“n Mondkapke” zee buurman Jan. “Dastoe dat as grunnoloog nait waist. n Flittertje is ja n lapke stof en dij dou je veur joen mörf, joen mond. Mor eh…. dou mie nog mor aine.”
Buurman Jan haar bliekboar de smoak te pakken. Hai ging der ais even goud veur zitten en schoof zien kopke richten de kovviepot en zien lege schuddel noar de schoale mit kouke.
“Traauwens waistoe wel woar t woord ‘lekker’ vandoan komt? Dat komt oorspronkelk van ‘likker”’ Dat woord is ooit gangboar worden veur smulpoap en lekkerbek. Dij lu likken ja geern. En van aal dij likkerij kwam t woord ‘lecken’. Vrouger wer der ook ja lekker eten en dikkedakt. Mor t mooiste komt nog. ‘Lecker’ wuir ook bruukt veur ‘klaploper, wellusteling, schoft’. En, let op: ook veur ‘smeerlap’. Snapst hom?”
“Nou nee”, zee ik, “ik snap nait wat t mooiste is dat nog kommen mout.”
“Nou”, zee buurman Jan, “der wordt tegenwoordeg deur bestuurders ja vanalles en nog wat lekt. Voak gebeurt dat bewust en dat deugt ja nait. n Lekker is dus gewoon n dikke deugnait, n gemain persoon. Dat lekken gebeurt mainsttied filaain en komt de lekker voak goud van pas. Tegenwoorden nuimen wie dat ook wel ‘n Segertje’. Zo waiten wie nou al dat t beoogde nije kabinet de medisch-ethische kwesties veur t gemak mor even aan kaande kwakt. Via dij lektaktiek kinnen wie ons doar nou alvast drok om moaken veurdat t definitief wordt. Tja, je zollen mor ongewìnst geforseerd zwanger worden. En vergeet nait de liedensweg van lu dij geern uut t leven stappen willen. Dij worden tot lieden dwongen vanwege n idee van lu dij zulf beschikken willen over aandermans zulfbeschikken.
Kom ik stap op. Mien Griet en ik goan aankommen weke n dag of wat mit traain aan rit. Kieken of wie ook n Segertje vinden. Wel in de daluren vanzulf, want din krieg je lekker körten. Wie goan vandoage alvast de koartjes kopen. En ik koop ook even n dikke pude lekkeris veur onderwegens. Tjeu.”
Dou buurman Jan vot was ging k op zuik noar d’oorsprong van lekken en likken. Zo het ‘likken’ ooit de betaiken had veur ‘n rad veur d’ogen draaien, veur de gek holden”’. En dat komt ons op t heden ook nait vrumd veur.
Aine dij lekt krigt ja voak gain lik uut de panne………
KOPSCHRABERIJEN 