“Schenk mie mor gaauw even n kop kovvie in, ik heb t nog slim drok.”

Buurman Jan zat bliekboar op haide kolen, dus ik zedde zien kovvie en kouke op n draf veur hom op toavel. “Woarom dizze hoast?” Vruig ik.

“Nou kiek, ik heb wat nijs bedocht,” zee buurman Kan. “Ik was vrouger radio-amateurist. Mien eerste uutzendens gingen via de kopern buizen van de wotterlaaiden. Op dij menaaier konden lu in de buurt mien ‘Deuntjes van Jan’ heuren. En ik mout zeggen: der wer veul noar luusterd. De Postkoets van de Selvera’s mit doarin Greetje Uut De Polder waren via de buizen geregeld op pad. En ik heurde voak, as k bie peerdeslachter Poater kwam veur zien lekkere vrizze worst, dat ter veul lu waren dij tiedens t draaien van De Trappelzakboogie van de Drie Kleine Kleuters en de Jonkers en de Joffers op toavel klommen en doarop mit aarms en bainen aan t speren waren. En in menneg huusholden wer der danst op Daar Bij De Waterkant en Bij Ons In De Jordaan. En ik heurde van Jans Snorre dat, as hai mitzong mit Zeg Niet Nee ee-ee-ee….en hai zien Elsie doarbie daip in heur ogen keek dij voak zong Kom D’r In. Dat was n nummertje van The Swinging Nightingales, in dij tied n grode hit.”

“Tja, dat was dou,” zee ik. “Mor mit zokswat kin je nou toch nait meer aankommen..”

“Nou kiek”, ging buurman Jan wieder, “ik heb nog wat van dij òlle apperatuur bewoard. Ik bin loater noamelk deurgoan mit n gehaaime zender. Ik dee dou drij moal in de weke De Piep-Jan-Knoedel-Sjo, Van Hier Tot Tokio. En ik bruukde dou n scannertje om de plietsiezender òf te luustern. De dainders waren doudestieds ja geregeld op jacht noar piroatenzenders. Kiek, en dou ik van de weke las dat de bevaailegen van de zunnepenailen bie veul lu zo lek was as n teemze dou docht ik weer aan mien scannertje.

Veul lu hebben bie ons in de buurt hebben ja zunnepenailen. Nou, mit mien scannertje pik ik dij signoalen din op, laadt d’infermoatsiestroom noar mien huus en sloag dij stroom op in n dikke grode akku dij k nog stoan heb. Stroom vergees, zeg mor.

Mor eh.., ik mout nou gaauw weer op huus aan om op beune mien apperatuur te installeren en òf te stellen. Dit is ja n golden tied veur t opwekken van stroom. Tjeu.”

Buurman Jan ging op n draf op huus aan. Ik haar der n haard heufd in. Mit vieftegerjoaren raive aandermans zunnepenailen hacken. Man, dat was ja n onmeugelkhaid.

Volgens mie was buurman Jan hangen bleven in Droomland van Willy Alberti…..