Lestdoags las k in t Dagblad n artikel over Bill Gates. Ie kinnen hom wel, de oprichter en mitboas van Microsoft. Hai het doar körtsleden d’hakken licht. Ainglieks het hai de zak kregen. Traauwens ook van zien vraauw.

Zulf zegt e dat hai uut aigen bewegen ontslag nomen het, mor volgens berichten speult ter wat inzoake eerdere scharrelderijen. Of hai inderdoad van bil(l) goan is blift nog n roadsel. Zo as zo voak is doar nait elk even eerlek over.

Ie kinnen vast wel lu dij oneerlek binnen, of bloazen dij te eerzuchteg binnen om van aandern wat aan te nemen. Dat soort lu kin je beter mor nait in heur eerbulten kommen. Dou ze ook veuraal gain oneerboar veurstel, want eer je der op verdocht binnen is t oremus. Onze Bill krigt zulfs trammelant mit berichten dij hai 20 joar leden verstuurd het. Dus kiek joen mailbox nog mor even goud noa.

t Is traauwens stoer om t elk noar de zin te doun. Bie sommegen huif je dat ook nait ains te perbaaiern. t Is voak nait goud of t deugt nait en doar huif je gain energie in te stoppen. In dat geval kin je mor beter de eer aan joezulf holden.

t Eergevuil krigt veuraal n deuk as der gain eer te behoalen is. En as je aargens gain eer van hebben, kin je doaneg in joen eer aantast worden. Veuraal as aanboden dainsten nait eerd worden. Ach, en wees nou ais eerlek: n eerzoam mìns zo as ie en ik paast ter toch ook wel veur op dat e nait eerd wordt woar e mit verkeert.

Tuurlek, der binnen veul eerleke lu. Lu dij zo eerlek binnen as gold en dij eerlek deur de wereld kommen. Mor ik kin ook aine dij zo eerlek is as Jochems Knelske.

Dij stal meel en brocht de zak weerom……..