“Wat zugst ter ja seupel uut, man. Konst wel sloapgebrek hebben.” Buurman Jan zat onderuutzakt aan de keukentoavel mit onder d’ogen dikke swaarde walen.

“Proat mie der nait van,” stìnde buurman Jan. “Mien Griet en ik binnen d’haile weke drok aan de studie wèst. Tot daip in de nacht hebben wie Joetjoepfilmkes bekeken over lesgeven in t onderwies. Wie binnen tot de konkluzie kommen dat n goud onderwieskonsept n goldmientje is. Dosenten van tegenwoordeg lopt t over de schounen en ze zitten, net as heur studenten, mentoal swoar in de kreukels. Ze binnen total lös. De schare van sommegen zugt ter beter uut as heur aigen echte ik.”

“Ik heb inderdoad lezen dat pillen, jointjes en lientjes bie veul studenten doagliekse kost is,” zee ik. “Aal snoevende doun ze de noam High School eer aan.”

“Dat zee ik,” ging buurman Jan wieder. “Veul studenten kieken de wereld veur n doedelzak aan. k Heb heurd dat ter in Stad buurten binnen woar lu boven de toiletpot heur oadem inhoalen. Dit vanwege de drugsdampen dij tiedens t deurspuilen de ruumte binnendringen. Lèstdoags schient òl Job Piepke, dij in t verpleeghuus zit, noa zien toiletgang stoned as n gernoat de gezoamelke huuskoamer weer binnen huppeld te wezen. Hai was in zien rolstoule hìngoan en kwam zunder weerom. Tja, wotterlaaiden en riolen zitten vol coke-restanten most waiten. Studenten schienen te lieden onder de veur heur gevuil veul te hoge prestoatsiedrok.”

“Vandoar netuurlek dij snoeverij, blowerij, hashiesderij en wieterij, “ zee ik.

“Dat zee ik,” zee buurman Jan. “Kiek, ons onderwieskonsept is d’oplözzen. Wie nuimen dij d’ADH methode. Dat is d’òfkörten van Aal Deurzakkend Horlepiepen. Wie geven studenten tied om even stil te stoan, uut te poesten om din weer dansend deur t leven te goan. d’ Horlepiep speul k traauwens op n doedelzak. t Symbolizeert n gezonde oademhoalen. Dat is goud veur t mentoal welwezen van de studenten. Zo hebben ze ook nog tied veur bieboantjes en zo. Tja, mien Griet en ik binnen bie de les, nee din?”

“Dat kin je wel zeggen,” zee ik begripvol.

“Zeker kinst dat zeggen,” zee buurman Jan. “Kiek, t Trimbosinstituut komt mit de publikoatsie Harder, Better, Faster, Stronger? Mor onze slogan is beter en bondeger. Wie avverteren mit: Nait Piepen, Kaanzen Griepen. Wie dochten eerst aan: Aal Tuutjefloitend Vlinderknippen. Mor mien Griet von dat t woord ‘vlinderknippen’ sommegen wel ais tegen de borst steuten kon as ze t woord letterlek opvatten gingen. t Leesniveau van veul lu is ja ondermoats.”

“Dat zol bèst kinnen,” zee ik. “Mor eh…. woar volgen de studenten bie joe din heur kolleges?” wol k waiten.

“Wie zetten n grode schure, veurzain van de modernste snufkederijen achter op t haim,” zee buurman Jan. Wie doun der zulfs blowers in.

Veur t dreugföhnen van t hoar vanzulf.”

“Zo ie pakken t professioneel aan mit joen baaident. Hejje veur joen onderwiesstee al n baauwvergunnen aanvrougd?” vruig ik

“Kirrel op peerd, doar hebben wie nait aan docht,” zee buurman Jan schrikachteg. “Doar zegst wat. Kom ik goa weer gaauw noar mien Griet. Even vroagen hou wie doar mit aan mouten. Tjeu.”

Buurman Jan ging noar zien Griet. Ik zedde d’olle transistor aan. Vanuut de luudspreker klonk, touvalleg of nait, t antwoord op veul vroagen:

Blowin’ In The Wind….