Posts tagged “strijd

t Leste woord

Leste woord

Zaterdag is via SOUNDCLOUD mijn nieuwste lied te beluisteren. De titel is d’Allerleste Dans. Als basis dienden twee gedichten: het eerder gepubliceerde de Leste Wals en het gedicht van vandaag.

as op de drumpel
van t twijduuster
de dood meedogenloos wacht

vragt t ìnde van t
staarvensproses
emootsioneel veul kracht

de levensdrang van
ieder mìns moakt
keuzes aibels zwoar

t verlangen noar mörgen
is in dij stried
dodelk levensvatboar

angst veur t donkern
moakt n mìns onmachteg
as n sprankje hoop nog gloort

want elk schoft t laifst
de tied noar achtern
veur t allerleste woord

eltje ©

Uutzichtsloos

Uutzichtsloos

ook op poaden
van pais en vree
tref je onhaail
op de weg

t noodlöt is
onveurspelboar
en slagt tou
zunder overleg

angst veur
onmacht gruit gestoag
bie elke stap
richten horizon

mor wordt t op d’omwegen
n weerloos worsteln
din is t n stried
dij zelden aine won

eltje ©

Gedachtegang

Gedachtegang
gedachten
worden woorden
as je ze doar
onderbrengen

achter mekoar
ontstoan zinnen
dij in de hitte
soms verzengen

standpunten
betrekken stellens
en meten krachten
in n toalstried

over onderwaarpen
dij mitwaarken
in de tegenwoordege
of verleden tied

eltje ©

%d bloggers liken dit: