Posts tagged “zoaleg midwinter

Stille Nacht, haailege nacht

Stille Nacht

Stille Nacht, Haailege Nacht via SOUNDCLOUD

Stille nacht, haailege nacht,
Vred’op oard, woar elk op wacht,
As elk mìns of e groot is of klaain,
In elk aander t beste wil zain.
Nait zoveul hoat en nied.
Ains komt ter n betere tied.

Stille nacht, haailege nacht,
t Grootst gelok is n mìns dij lacht.
Loat wie ons mit n kander verdroagen.
Geef wat waarmte as aandern dat vroagen.
t Is toch echt muite weerd
As elk dat van jongs òf aan leert.

Stille nacht, haailege nacht,
Sloap gerust, dreum mor zacht.
Van ain wereld zunder geweld.
Zo as in sprookjes beschreven en vermeld.
k Dou mien best doarveur,
Laifd’en begrip geef ik deur.

Tekst: Geesjen Doddema
Muziek: Franz Gruber

Soamen Ainzoam

Soamen Ainzoam

Soamen Ainzoam via SOUNDCLOUD

 

Elke dag allìneg wezen, dat vuil hom laank nait tou.
Ainzoamhaid slecht veur t gemoud, soms wozze nait meer hou.
Doagen duurden veul te laank, dij leken n aiveghaid.
Hai was t proaten zowat verleerd, aansproak had e nait.

As t duuster wuir en d’oavend vuil, din was t mainsttied roak.
In toavel wazzen kringen trokken, vlezze ston doar voak.
Had e bodem weer te pakken din huil hai t nait meer vol,
Din sluig hai d’achterdeure tou, wos nait wat hai wol.

Zo luip hai din ook op dij oavend, kroag omhoog, doulloos droavend,
Veurspelboar wat hai zo aal zag deur t vìnsterglas.
Bie nummer negen was t glìn van t licht, op dattien reerde t lutje wicht,
En t was huil vrumd as t doar op d’hörn duuster was.

t Leek hom tou dat dizze oavend hail aans was as normoal.
Hai kwam veul lu op stroade tegen, dij lagden allemoal.
En in verte heurde hai kerkklokken helder sloagen.
Dou wos hai dat t zo wied was, dit was weer ain van zien minste doagen.

Hai dook nog daiper in zien kroage, n roar gevuil kwam in zien moage,
Hai kende dat gevuil veuraal as t kersttied was.
Dij doagen van vree, soamheureghaid, van daip bezinnen, verdrongen verdrait
verbrocht hai soamen ainzoam mit zien glas ………..

Tekst en meziek: Eltje Doddema

n Zoaleg Midwinter

Zoaleg Midwinter

n ZOALEG MIDWINTER via SOUNDCLOUD

In t òlle joar het elk wat wonnen,
n Hail joar laank is t leven verriekt,
Mor elk het zok wel ais bezonnen,
As e winst en verlais goud vergeliekt.

In elk joar, joa das vervast,
Goan gelok en tegenslag noast mekoar.
Elk hoopt din ook te worden verrast,
Mit veurspoud in t nije joar.

Refraain:
n Zoaleg Midwinter veur joe alemoal.
n Zoaleg Midwinter wenst elk in zien aigen toal.
n Zoaleg Midwinter aalmoal mit mekoar.
n Zoaleg Midwinter en veul zegen in t nije joar.

Tekst en muziek: Eltje Doddema

n Stoetje mit n plak keze

CD - n Zoaleg Midwinter

n STOETJE MIT n PLAK KEZE via SOUNDCLOUD

Gedienen dicht, n keerske aan, n stoetje mit n plak keze.
Dat zol veur mie t ideoale kerstfeest vieren wezen.
Gain overdoadeg bunkern, gain dure kerstdiners.
Gewoon mit die veur kachel zitten, elk n stoetje mit n plak keze.

Tekst: Geesjen Doddema
Muziek: Eltje Doddema

Van de CD: n Zoaleg Midwinter

%d bloggers liken dit: