de grìns
tussen welwezen
en ellìnde
is flinterdun
selekteer
doarom vanòf
t allereerste
begun
eltje ©
Posts tagged “welwezen”
in n woanzinnege
wereld worden lu plet
tot geestelke en
liggoamelke wrakken
onder drok van
ekonomische grui is
de weerstand doaneg
aan t verzwakken
getallen worden bruukt
en manipuleerd om zin en
onzin aan te geven
mor
t ontbrekt dudelk aan
sievers veur gelok en
kwaliteit van leven
eltje ©
de wiezer noadert
troag en taargend
t tiedstip
insteld
deur t regime
t welwezen wordt
deur d’oavendklok
aantast
mor rechtvoardegd
as legitiem
t is t uur
van t ontzörgen
en van tranzietsie
van mìns
noar n loden last
kaptoalen
dij wegzet worden
om saneren te kinnen
stoan mit zörg
in schril kontrast
eltje ©
der is
aal meer
wat nait meer mag
over wat mag
doun aandern
heur beklag
deur aal
dat mindern
en dij protesten
binnen we
t welwezen
aan t verpesten
eltje ©
de vernedernde teloorgang
van zörg en welwezen
is wat mennegain
tot daip in t haart stekt
as partisipoatsieboanen
binnen z’ongeschikt
omdat din voak
de passie ontbrekt
eltje ©
deur
kroanen te dichten
en gas te mindern
komt de rieksbegroten
onder druk
n strop
dij ’s laands welvoart
smoort mor essentsieel is
veur t welwezen
en geluk
eltje ©
t verleden
bepoalt dails
de toukomst dij je
as aarvenis vrijwilleg of
opdrongen nait waaigern kinnen en
dij net as
welvoart en welwezen
as kommuniserende voaten
mit mekoar verbonden binnen
t heden
wordt mit beïnvloud deur
politiek en finansiële maarkten
woaronder perspektieven
meedogenloos bezwieken en
instabiele soamenlevens
wankeln onder wetten
dij rechtveerdegd worden
deur vervoelde statistieken
bewust
of onbewust
speult elk n aigen rol in
manipuloatsie- en verdainmodellen
woarbie
respekt
en transperantsie
onderschikt binnen aan
opgesmukte suksestabellen
eltje ©
aal blindstoarend op
finansiële prikkels
gaait d’infrastruktuur van
onze soamenleven stoadegaan
noar de knoppen
aal privatizerend van
negootsie en dainsten
is de bonuskultuur
van n dikbetoalde manager
nait te stoppen
vrouger
was op de maarkt
n gulden n doalder weerd
op t heden
wordt welwezen doar
stelselmoateg òfwoardeerd
eltje ©
de man kikt
deurdringend in d’ogen
van de vraauw tegenover
dij ain en aal zenen
poestend en stìnnend
talloze zoaken verkloart
verkregen gegevens
worden digitoal verwaarkt
en n laptop brengt
noa n leste drok
op enter d’uutslag
definitief in koart
onder t mom van
bedainen op moat
en persoonleke aandacht
wordt de levensloop
blootlegd en ligt de noadrok
op t beheersen van kosten
verlainde mantelzörg
deur buren of femilie
wordt uutruild
tegen n traplift
of steunkouzen
en aandere posten
t recht is verdrongen
deur intakegevallen
en de puutholder is ain
mit de beoordailoar
de terugtredende overhaid
komt ain nait tegemuide
en t welwezen weegt din
wellicht minder zwoar
eltje ©
leven
van weekend noar weekend
in n neerwoartse spiroal
woarin vrijhaid n illuzie is
toukomst
verworden tot n slietoageproses
wordt zuver strak programmeerd
in n wereld vol duusternis
welwezen
ondergeschikt aan meten
wordt boegend en brekend
òfbrand tot op de bonken
systemen
woar kontroleren wegen is
holden liggoamen in iezern grepen
van obsezzies vol spelonken
eltje ©
KOPSCHRABERIJEN 