Posts tagged “weerspreuk

Weer

Wos je lu, dat ter grofweg drij soorten minsen op de wereld binnen? In d’eerste ploatse dij, dij naargens verstand van hebben. Din binnen der lu dij volgens aigen zeggen overaal verstand van hebben. En ten daarde binnen der lu dij van d’eerste baaide soorten profiteren. Mor toch hebben ze ook ain ding gemain. Te pas en te onpas prat elk over t weer.

“t Weer” is noamelk n gewild gespreksonderwaarp. Want t is nooit goud of t deugt nait en dat paast mìnsen persies. Ze kinnen din in weer en wind even lekker jeuzeln en kloagen. Din binnen zai net boeren. n Boer dij t weer tegenzit wordt ook ja vranterg en weerzaik.

Lu mit of zunder weerglas en wel of nait uut Garrelsweer doun zok voak veur as echte weerdeskundegen. Zo heb je mìnsen dij heur liekdoorn aaltied n meroakels goie weerwikker is. Ze vuilen persies aan of t waskeweer, heuersweer of fietsersweer wordt. En ze waiten zulfs of kinder roeg in de kop worden.

Minder is t as stainswellen joe dwaarszitten en je aaltied weerpiene hebben. Dij steken veuraal as der swoar weer op komst is. Ie waiten wel: van dat weer dat je joen hond nog nait noar boeten sturen. Mor ook as t t mooiste weer van de wereld wordt, kriegen dizze lu geregeld weer last.

Nou wait elk dat, as swaalfkes hoog vlaigen, t weer goud blift. En dat n zaike nait veul weerstand het is ook woar. Mor of d’olle weerspreuk: “t weer en de vraauwen binnen nait te vertraauwen” ook woar is mout je zulf mor even bekieken. Op de verholden tussen man en vraauw kin van weerskanten wel wat aan te maarken wezen, nee din? Veuraal as ain van baaident n verlaaiden nait weerstoan kon.

Tja, din kin dij doarnoa wel mooi weer speulen, mor je waiten: as miede vlogt, is der swoar weer op komst.

Wat dat ter mit te moaken het?

Nou gewoon: as de wind krimpt wordt de kans op maal weer groter.

Nou ie weer……

%d bloggers liken dit: