Posts tagged “wals

De leste wals

Wals

hai zag
de lichten in
glìnne kleuren
hai heurde klanken
dij zuver klonken

hai rook
d’aroma’s van
veule geuren
hai vuilde laifde en
verlangens bonken

mor zien
zinnen begonnen
te slieten
en ale krachten
ruiken uut balans

berustend
mit heur in
d’aarms
was t nou tied veur
de leste dans

eltje ©

(leven)SLOOP

Vergoan

beelden op tv
teunen d’haile dag
de wereld
vol leven
en dieverdoatsie

stil en stom
zitten as zombies
8 liggoamen
in n gezoamelke
akkemedoatsie

uut luudsprekers
klinkt in stereo
n melodie
in mineur en
in drijkwartsmoat

n wals
dij d’oldernzörg
symbolisch plet
zodat dij òfglidt noar
n ondermoatse stoat

eltje ©

Klem

Driefveren

in systemen
woar aal voaker
kwantitatieve prikkels
aigenbelangen verstrengeln
deurdat scores geld genereren
zit de duvel elk op d’hakken

in klimoaten
woarin bonuzzen
koppeld worden aan getallen
deur statistieken op te drieven
en te sturen op kwantiteit
goan managers over mìnselke wrakken

deur gebrek aan integriteit
binnen eerlek- en oprechthaid
wereldvrumde woorden
en worden lu tot wanhoop dreven
omdat psychische drok
laaidt tot ìnkeld minnen

t welwezen wordt plet
onder n wals van korrupsie
woardeur aal minder lu
de dans ontspringen
omdat ze in n drijkwartsmoat
gain jive dansen kinnen

eltje ©

%d bloggers liken dit: