Posts tagged “waarklooshaid

Veenkolonies

Veenkolonies

t was
t volk
van törf-jenever dat
stom en stoens
achterdochteg was

t was
t volk
van sproakeloze schoamte
dat stoere woorden
nooit sprak en las

nou is t
t volk
dat mit n stìmpel
dommeg is
en ongeschoold

nou is t
t volk
dat leeggeletterd
dik en rond deur
de wereld doolt

mor

is t wel
t volk
van overmoaten
van ongezond en
seupelhaid

of is t meer
t volk
mit n gezonde
moate van
nuchterhaid

eltje ©

Duvels

Duvels
in n wereld woar
knooiers en pokkeloars
aal poestend en stìnnend
perbaaiern om de kop
boven wotter te holden om
ongeschonden te overleven

wordt ter tussen
glamour en korrupsie deur
grof geld verdaind
deur n haandjevol graaiers
dij zich boadend in luxe
loungend aan wellness overgeven

t vermogen vermoalt
de wereld tot n daip
verdaild onvermogen om
t op bulten schieten
van de duvel doadwaarkelk
en effektief aan te pakken

n ongeliekhaid dij laaidt
tot schaive verholdens
woar onder invloud van
populisme en racisme
soamenlevens tot op n
bedenkelk niveau òfzakken

eltje ©

%d bloggers liken dit: