Posts tagged “vrijheid”
“If you don’t need a mask because god will protect you, why do you need a gun…….?”
Wèl beelden van t voetbalweekend zain het kon mit aigen ogen zain dat veul lu zok waaineg aantrokken van de woarschaauwen van demissionair minister Hugo de Jonge om tiedens de wedstried zitten te blieven. Ook bölken en zingen zol uut den boze wezen. d’Evenementenbranche is din ook des duvels en is van mainen dat ter mit twij moaten meten wordt.
Net as zai hebben ook kefees en hotels d’hoaken al aan de latten timmerd om heur bestoan aan te hangen. Doarom wer der in t weekend din ook protesteerd. En ook doar waren allerhaande protestborden te zain. Zo van: Wie beschaarmen elke klant tegen de Deltavariant. En wat docht je van: d’Horeka is goud veur pokkel en vertier: mit vaste prik blendern wie vaccins deur t bier.
Mor goud: dij Engelse tekst aan t begun kwam k tegen op n wit t-shirt. n Jonge blonde Amerikoanse vraauw teunde dij mit de borsten veuruut. De reaksies doarop waren dails richt op de tekst, mor veuraal op de kleur: blond. Doarbie betrof t nait t goldgeel gekleurde bier in hotels, kefees en horeka. En ook nait “Blonde on Blonde” van Bob Dylan. t Waren reaksies in de trend van: laank blond hoar en kört verstand.
Je kinnen zo’n tekst netuurlek ook mit n knipoog bekieken. Of zulfs hail serieus.
Kiek: stof, geweld en geleuf beschaarmen mìnsen nait. Dizze konkluzie kin je wel trekken as je de toustand in de wereld objektief bekieken. Vanòf t allereerste begun het de mìns zain loaten dat ter niks is om de zogenoamde “beschoaven” te rechtvoardegen. Meschain dat “mìns” doarom “dom” as touvougen kregen het: de mìnshaid het zokzulf devalueerd tot t mìnsDOM.
As je d’invlouden van stof, geweld en geleuf betrachten is dit in wezen n logische ontwikkeln. Elk is n kritikus totdat e direkt beïnvloud wordt deur datgene woar e kritiek op levert.
Ik luit buurman Jan de foto mit dij Amerikoanse derop ook even zain en vruig hom wat hai der van von.
“Schier poedie,” was zien reaksie.
Tja: kritiek kin dus wel degelk pozitief wezen……
Binnen ie ook zo aine dij de leste tied hail aans denkt as dat e prat? Veuraal as je in gezelschop binnen? Dat je eerst even om joe tou kieken veurdat je de revel opendoun? En dat joen woordkeus òfhangt van t volk in de buurt?
Wat zeggen ie? Ie proaten onder t denken nooit in joezulf? Dus huif je doar nait over noa te denken? Ie leven in n vrij laand en je kinnen zeggen wat je willen? Goud, dat zal zo wezen, mor t kin gain kwoad om joen gedachten der toch ains over goan te loaten. En din veuraal over wat je eerder wel zeggen of schrieven duurfden mor nou nait meer. As je t goud noagoan wordt t n laank lieske. En dat zal je vast gain verlanglieske nuimen.
Woarom je der over noadenken zollen? Tja, veul journalisten en stokjesschrievers doun dat noamelk wel. En dat nait zunder reden. Nait omdat ik dat zeg mor uut bittere neudzoak. Om te overleven.
Elk laand dat demokroatische weerdes hoog in t voandel het is boat bie t funksioneren van onòfhankelke media. Der binnen echter zat landen woar dit nait of nait meer t geval is. De stoat bepoalt welk nijs t volk te zain krigt. En der binnen aal meer machthebbers dij der alles aan doun om “de vrije pers” de kop in te drokken of zulfs te verbaiden. Dat doarveur journalisten oppakt, marteld en/of vermoord worden is in dij landen nait ongewoon. t Is doarom beangstegend te konstateren dat ter ook in ons laand krachten speulen dij de vrije media nait bepoald goudgezind binnen. En bie t minste of geringste t woord “korrupt” in de mond nemen.
Nou is t zo dat politieke dwaarsverbanden via partijen, bedrieven, boantjesmallemeulens, partnerschoppen en/of t dailen van mekoars spondes, LAT-achterkoamertjes of bezzemkaasten nou nait bepoald de beste veurwoarden veur n onveurwoardelk vertraauwen in n onòfhankelke publieke omroup binnen.
Vergeet nait dat vrijen in veul gevallen n leugenachtige ambacht is; t is voak zachies proaten en haardop laigen. Boetendes: vrijen onder ain dak is ja n groot gemak. En dat persoonleke belangen de belangriekste motieven binnen om bevredegen te vinden en te kriegen is aalgemain bekìnd. t Zoad kropt ja woar t nait goan kin.
As we doarbie ook de trollenlegers en de nepnijsverspraaiders en heur dom volk betrekken din wordt ain ding dudelk: vrij en aigen, zo as oorspronkelk bedould, wordt aal meer betuun. Aal zeldzoamer, dus.
As t mor nait vrij zeldzoam wordt….
