Posts tagged “voetbal

FIFA

FIFA

de stank in
fifa’s beerputten
het n lucht van
voeleghaid

en

onder de deksels
ontwikkeln zich
schandoalen vol
rötteghaid

in n lieveg rapport
ontkent n kemizzie
t schimmeg en
frauduleus handeln

mor

onvolkommenheden
en vaalze veurstellens
verbaargen de wegen
dij ze bewandeln

eltje ©

Hollandse school

Hollandse school

over smoak vaalt
nait te twisten
wel over de zin
van voetbalanalisten

veul wordt ter hikhakt
over d’hollandse school
as was dat n soort van
stoatussymbool

doarom hier de taktiek
van de nuchtere nederlander

scoor ainvoudeg mor aine
meer as de tegenstander

eltje ©

Aigen rechters

Aigen rechters
n horde lu
dij nog minder
as baisten op jacht noar wild
de stilte en alles
wat lös en vast zit
schoamteloos verscheurt

wordt nait
as n koppel agressieve wilden
karakterizeerd mor
krigt voak de kwalifikoatsie
dat dij tot n traauwe
supportersgroep beheurt

t is n schaande veur n klub
as zien gepeupel uut de spelonken kropt

mit as dezastreuze gevolg
dat de verkeerde mainsstied votlopt

eltje ©

%d bloggers liken dit: