Posts tagged “verschillen

Duvels

Duvels
in n wereld woar
knooiers en pokkeloars
aal poestend en stìnnend
perbaaiern om de kop
boven wotter te holden om
ongeschonden te overleven

wordt ter tussen
glamour en korrupsie deur
grof geld verdaind
deur n haandjevol graaiers
dij zich boadend in luxe
loungend aan wellness overgeven

t vermogen vermoalt
de wereld tot n daip
verdaild onvermogen om
t op bulten schieten
van de duvel doadwaarkelk
en effektief aan te pakken

n ongeliekhaid dij laaidt
tot schaive verholdens
woar onder invloud van
populisme en racisme
soamenlevens tot op n
bedenkelk niveau òfzakken

eltje ©

Schaaidslienen

Schaaidslienen
soms
is tolerantsie
te waaineg onderheveg
aan zulfrefleksie
en geft men over d’höchte
van d’aigen frustroatsiedrumpel
gain bliek van zulfkritiek

soms
verhaardt geliek hoalen
van vervente vechters
achter opgetrokken schaarmen
in n schimmege stried
en geven dij zulf
van duldzoamhaid waaineg bliek

inzichten verschillen
ze geven mainens kleur

mor ook laaiden ze
tot star prestigeterreur

eltje ©

%d bloggers liken dit: