Posts tagged “veiligheid

Rheezerbelten

“Hou vinst hom?”

Buurman Jan ston mit borst en lief strak veuruut noast onze keukentoavel. Nou hof hai doar nait aal teveul muite veur te doun, omreden zien veurkaande ston in ruststand ook al oardeg schier noar veuren. “Dizze het mien Griet bie AliExpress besteld, soamen mit net zo aine veur zokzulf. Kiek, mörgen goan wie mit de Lada De Luxe mit onze elektrische fietsen achterop noar de Rheezerbelten. Mit ons baaident moaken wie doar bie de Vecht din de blits in ons nije fietstenue.”

Ik mos tougeven dat t wel n hail slim in t oog springend pakje was: spans om de pokkel in de mainst òfzichtelke neonkleuren. Dat heb k der mor nait biezegd, omreden n kadde mit zeuven steerten mout je ja nait sneu moaken.

Dus ik zee dat t n tenue was dij op de weg goud opvuil en veur de vaaileghaid n goie keuze was. Want dat zai je ja wel ains aans. Je trevven veul te voak fietsers dij in de schare van de dik bebloaderde bomen zo goud as onzichtboar over de weg fokseln. Levensgevoarlek.

Voak ook nog stoens noast mekoar fietsend. Ook op dij plekken woar achter mekoar veul verstandeger wezen zol. Nee, veul fietsvolk het gain benul van wat veur gevoar ze ainglieks op de weg binnen.

Veur veul fietsers geldt dat ze frank en vrij en aal tuutjefloitend deur t leven goan willen. Oog veur t snelverkeer hebben ze voak nait. Ik zol ze nait geern de kost geven willen, de lu dij bie n òfslag midden op de weg van de fietse springen om te hikhakken over welke richten ze nemen zellen.

Tja, as sommegen de fietse onder de kont hebben ligt t gezond verstand nog thuus in de kaaste noast d’opvalende klaaier. En vergeet ook nait aal dij kloetjefietsers. Lu, dij veul te stoef op en achter mekoar en mit n kop as n bolle heur hobby bedrieven. Lu dij zok in n veul te strak-om-de-pokkel- lycrapakje in t swait joagen.

Mien ol opoe zee vrouger as aine ais n moal weer zien of heur beklag dee over n ongemak: “Alles wìnt, ik heb Tjakko.” Ain ding is zeker: t ongemak van zo goud as onzichtboare fietsers wìnt nooit.

Ik zee nog tegen buurman Jan dat t mörgen in elks geval geweldeg weer worden zol veur t elektrisch trappende en snelsnitternde picknickverkeer. Echt weer om joe mit t swait onder d’oksel onder aal t aandere volk in Lycra-Unisex-Tenues te begeven. De zogenoamde LUT-ters. Ook dit lèste zee k mor nait haardop.

Wat zeggen ie? Vinden ie t wat aal te generalizerend steld?

Ach, netuurlek lu, je mouten fietsers ja nait belaggelk moaken. d’Aine racer is d’aander ja nait. Toch?

Dat geldt ook veur lu op de Rheezerbelten……

Mörgenlicht

Wrakken veraandern brandende wegen in voagevuren vol hoat.

Verminkte gaisten bepoalen de moate van aal t zinloze kwoad.

Mìnsen wankeln machteloos in n wereld hail filaain.

Nait elk zal mörgen gezond en wel t mörgenlicht weer zain.

Woanzin wint meedogenloos van elk verstandeg woord.

t Licht aan t ìnd van tunnels komt in veul gevallen te loat.

Op kreten van hulp in t baalkeduuster reageert gainain.

Nait elk kin mörgen gezond en wel t mörgenlicht weer zain.

t Ìnd is veur elk swoar te droagen zunder onderschaaid.

Soms stoan rozen vergeten te wachten op wel eerder gaait.

Doagen binnen soms angsteg swoar, want lieden is gemain.

Nait elk hoopt mörgen gezond en wel t mörgenlicht te zain.

Mit troanen in de stromende regen is wanhoop nait te sturen.

Tred wordt swoar, t pad lopt dood tegen kèlle blinde muren.

Zinloos is t leven as dij vuilt as n blok aan t bain.

Nait elk wil mörgen gezond en wel t mörgenlicht weer zain.

Zun zakt zachies in t twijduuster d’horizon veurbie.

De lèste waarme zunnestroalen omaarm ik soamen mit die.

Zo vuilt n perfekte wereld veur groot en ook veur klaain.

k Hoop ook mörgen weer soamen mit die t mörgenlicht te zain.

%d bloggers liken dit: