Posts tagged “vakantie”
“Schenk mie mor gaauw even n kop kovvie in, k heb hoast!”
Ik kon t nait òfkieken. Buurman Jan zat, veur k derop verdocht was, al aan de keukentoavel. “Wat nou”, zee ik. “Lu zo as wie huiven ja niks meer, wie maggen ja alles. Dat is t veurdail van op penzioun wezen. Duvel zit die toch nait op d’hakken?”
“Man, hol mie derover op”, reageerde buurman Jan vergrèld. “Ik mout votdoadelk weer thuuskommen. Mien Griet het mie de wacht aanzegd. Dij het lezen dat de moand september n populaire moand is om vrumd te goan. t Schient dat bie lu d’hormonen din t mainste jeuken. De tied tussen t ìnde van de zummer en t begin van t noajoar is slim in trek veur “van dizze op n vrizze”. Waist wel woardeur dat komt?”
“k Zol t nait waiten, mor as k t zo inschat kinstoe mie dat wel vertellen. Dien Griet het die t vast hoarfien uut de douken doan”, zee ik en ging der ais even goud veur zitten.
Buurman Jan vervolgde zien reloas. “Dat komt omdat mennegain der in de vekansie achter kommen is dat de knientjesdoagen aal meer betuun worden. Heur reloatsie is transformeerd in n REL-oatsie. Dus strunen der dizze moand op de waarkvlouer veul vrumdgangers rond. t Is ain en aal wupperij in direksiekoamers, kopieerhokken en mageziens. t Binnen deurgangshuzen veur tanga- en sliplozen. Mien Griet het doarom de teugels aanhoald. Lokoatsies boeten ons aigen haim binnen veur mie dizze moand taboe.”
“Doar kin k mie wel wat bie veurstellen. n Man mit n goddelk liggoam zo as doe is t prototype van n vrumdganger. Dien Griet het doarom alle reden om zok zörgen te moaken.”
Buurman Jan stapde noa ain kop kovvie gaauw op. Zien Griet haar hom goud onder stuur, ook al was t bie heur vast nait doaglieks sex, drugs en rock’n roll.
Tja, t kin soms vrumd goan in t leven……..
De Freuleviever ligt in t Olle Bos op t landgoud De Slotplaats tussen Wijnjewoude en Bakkeveen. Dit bos is rond 1880 aanlegd deur d’oadelke femilie Lycklama à Nijeholt. Lestdoags luip ik doar mit vraauw en hond. Zo gaauw je n ìndje van de hoofdwegen òfbinnen kom je in n ooaze van rust. t Is der indringend stil en dat ervoar je in ons laand nait veul meer.
Ik mos hier aan denken dou k t bericht las over de topdrokte op campings, vekansie- en bungalowpaarken. Veur joen rust huif je doar nait hìn te goan begreep ik. t Lewaai van boosters en tweaters wordt overstemd deur t gilpen van eelske doedels en t gelal van doene snokkels. De kombinoatsie eelsk en doen is hailendaal n ramp.
Rustzuikende, eerzoame koalen en grieskoppen zitten mit d’handen in t hoar. Joa, je lezen t goud: ook de koalen. Ze hebben gain rust of duur. n Rustege zummeroavend zit ter nait in. Ze kloagen doarom stain en bain.
Zo gaauw de jonge zombies van veuren nait meer waiten dat ze van achtern leven is der gain holden meer aan. En dat is nait omdat t doar van de moezen wemelt. t Komt deur lu mit n mentaliteit van: dij din leeft, dij din zörgt en dij t laankste leeft, krigt alles. Tja, dat volk leeft mor ainmoal in de wereld en dat is net nou.
Doarbie komt ook nog de stank van verlopen eulie, woar al op tied de patat in kwakt is. De vedde locht doalt as n dokege waalm over schier opgepoetste caravans en trekt as n mörgendook filaain onder luivels en in veurtìnten. Sommegen leven nait om te eten, maar eten om te leven. Over zoepen nog mor te swiegen.
Nou mout je netuurlek nait aal t jonkgoud over ain kamme scheren, mor t is tegenwoordeg in om “de jeugd” in de watten te leggen. Meelieden is op zien stee. Dit vanwege de swoare Coronatied dij ze achter de rogge hebben. Ze hebben in dit rötjoar aldernoarst leden en bezwieken biekans onder de psychische klachten. Ach, gun ze toch heur feest. t Is vast jonkhaid en dat verwaast wel weer.
Buurman Jan kwam guster nog even aanwuppen noa n weekje kampeerderij. Hai was, zo as t leek, glad in de jonkmeulen: hai haar alle doagen goud mit t jonkgoud mitfeest.
Zien freule Griet was doarover minder te spreken……..
Bin j’alweer veur poelegrap en oardeghaid op pad west, lu? Even n ommetoertje moaken mit traain of bus? Even omdiedeldaantjen in toen- of meubelsentroa? Even n oepke mit joen aigen stoalen rös richten Stad? Of haar je vot al eten en dronken dou je in n lange riege terechte kwamen woarin je wachten mozzen om aargens tougang te kriegen?
Ik kin mie veurstellen dat kloetjeklitterij naIt ain van joen prioriteiten is. As wie de sievers en statistieken leuven maggen zit besmetjederij nog aal in de locht of zo as dat tegenwoordeg hait: “in the cloud”. Kiek as je locht waren haar je naargens last van. Ook nait van dij anderhaalvemeter-moatschoppij. Mor t bliekt aal meer: as t aan dij domdriesten ligt dou je as eerboare burger veur gain meter meer mit. Òfstand holden is der nait bie.
Wellicht dat ze joe nog wat in de reken hebben as je thuus wat zulfgeknuterde anti-sputter- en spijlapkes naaien. Want de zummer lokt en d’hormonen begunnen te jeuken. Elk schient op dit mement viroloog te wezen. t Jonkgoud begunt zich te ruiren, net as middenstanders, gastronomen en lu mit sportgerelateerde fokselapperoaten. Ze willen aalmoal weer uutbundeghaid en pierewaaien.
Dudelk is dat de gezelleghaid van tuutjefloiten en vlinderknippen nait meer bie t nije normoal heurt. Doar komt bie dat t n haile zuikerij wordt om n vekansieadres te vinden woar je wat omkeudeln kinnen. Dieverdoatsie boeten aigen haim wordt ook nog ains n dure aangelegenhaid. Veur n dubbeltje op d’eerste rang is der nait bie. En din hebben wie t nog nait ains had over joen sexleven. Körtom: vekansieperikels zat, dus.
Traauwens: der schienen manlu rond te lopen mit stresstiekels…….
KOPSCHRABERIJEN 