Posts tagged “tuig

Schoelen

Heb je t ook lezen lu? t Dagblad meldde dat in t Noorderplantsoun in Stad de görde goar is. t Is nait zo dat ze dij doarnoa mit stroop serveren, nee, t betreft tuig dat doar leeft as god in Frankriek in n deur heur zulf gekreëerd weldorado. Ze leven zok doar bie nacht en ontied noar haartelust uut op n, deur de stadse hermandad en t lakse gemaintebestuur getolereerde, mizzebulde.

Wat ik ook las was dat men nou t veurnemen het om de ploatselke verordenen aan te pazen, omreden pappen en natholden is gain sukses. Nou is dat sowieso al n bezeghaid van niks, omreden de pap woarin je ruiren begunt op den duur te dijen. De smurrie dij din ontstaait, doar kom je mit gain brijlepel meer deur. Tja, veur dizze kennis huif je gain kok te wezen.

Elk en ain mit gezond verstand en levenservoaren wait dat pappen en natholden op n fiasko uutdraait. Desondanks lees k tot mien stomme verboazen dat ter n poar politieke partijen binnen dij muite hebben mit n haarde aanpak. Dij vinden t walgelke wangedrag zulfs begriepelk. Dij mizzelke mentaliteit komt volgens heur ìnkeld en allain deur de coronamoatregeln. Aal dij misbaksels hebben gain schuld. Je mouten mit dij minkukels meelieden hebben. En volgens dij waiken gaait t vanzulf over en wel op t mement dat de krougen weer opengoan.

As k dit lees denk ik dat dit vast lu binnen dij heur aigen noageslacht mit flewailen handschounen aanpakken. Ie waiten wel, zo’n veurbeeldeg rekloamegezin dat ons leuven loaten wil dat heur opvouden n meroakels groot sukses is. Zai hebben aalmoal schatten van kinder dij aalmoal t veurbeeld binnen veur ale aandern.

Of zollen t olders wezen dij gain boas meer binnen in aigen huus. Stumperds dij niks meer zeggen duurven van t gedrag van heur aigen grommen. Dat soort gezinnen kin je vast ook wel.

Of zollen t lu wezen dij doaglieks mit heur jongen alles uutonderhandeln, lekker gezelleg diskussiërend aan d’eettoavel. Doar is t noa n hap nait gewoon slikken mor eerst nog n haile laange tied kaauwerij.

Tja, t kin netuurlek ook wezen dat t heur aigen netuur is. Ze vinden t nait slim om aandern tot last te wezen as ze zulf de baist uuthangen. Mor t kin ook wezen dat ze t hail drok hebben mit heur politieke karrière en aandere verplichtens. Ze kommen aan opvouden nait meer tou, loat stoan dat ze mit mekoar in gesprek kommen.

Dit leste liekt mie nait onaannemelk. Ze waiten nait meer wat ter onder t volk leeft. Ze hebben schienboar gain benul van aal t leed en t verdrait van omwonenden van t Noorderplantsoun. Ze waiten domweg nait dat lu doar schoelen mouten veur geluudsoverlast deur gettoblasters en de grootbekken van traaitertuug van de riggel. Ze hebben der gain ìnkele nootsie van wel de brij doar ainglieks koulen mout.

Traauwens: veur pappen en natholden kriegen politisie ook geld. Mor of ze t din verdainen is n aander verhoal. Mor ja, dat is nait bloots in Stad zo. t Is in ale grode steden ain pot nat. Aal mit aal strontnat, dus.

Of schoelen din nog helpt……..

%d bloggers liken dit: