Posts tagged “syrië

Kobani

Kobani

Foto: Lefteris Pitarakis/AP

n stad
vol helse vuren en
gruwelke wandoaden
dij onder t aalzaind oog
van bevrijders
ploatsvinden

is t
teneel van
n smereg schoakspel woar
hoave en goud en
mìnselkhaid finoal
ontbinden

levens binnen
ondergeschikt aan
lugubere belangen

want machten en
kaptoalen bewandeln
duustere gangen

eltje ©

Nevenschoades

Nevenschoade

mantels bedekken
makoabere leugens over
geweld
en massamoorden

veronderstellens
worden woarheden vol
aannoames
in warrege woorden

slachtovvers binnen
onverkloard vogelvrij en
ondergeschikt
aan leven en dood

collateral damage
wordt aksepteerd en zet
konfliktbarometers
daip in t rood

eltje ©

Beestachteg

Wereldteneel

onder t mom
van vrijhaidsstried
brobbelt t vraidste
in de mìns noar boven

slachters en
verkrachters
daainzen nait weerom
levens luguber te beroven

gewaitenlooshaid
moakt ze blind
veur elke vörm
van rede en mìnselkhaid

barboarshaid
wordt tot kultuur
verheven tot in
n hiernoamoalse aiweghaid

eltje ©

%d bloggers liken dit: