Posts tagged “symbolen

Licht

in de schare
van n stoatege boom
staait n baank
van nait vergeten
woarop zitten goan n zunde is

n sereen stee
van stil herdenken
woar troanen valen
soms verdrongen
om reden van t gemis

tastboare symbolen
van veul herinnerns
liggen vredeg
as n kompozietsie
in n verhoal of gedicht

swaarde letters
weerstoan weer en wind
trotseren emootsies
om te vertellen
rond schare is der licht

eltje ©

Welwezenloos

Welwezenloos
dichte deuren
van lege tehuzen
worden symbolen
van zörgzwoartepakketten
dij t recht op n stee blokkeren

levenloos stoan
straks aal meer panden
woarin ooit vol
touwaaiden zörg was
tot baauwvalen te kreperen

t haart is vot
sneden uut t respekt veur
hulpbehuivendhaid en olderdom

geld bepoalt
mit femilie of buren of je
partisipoatsie wel vuilen as riekdom

eltje ©

%d bloggers liken dit: