Posts tagged “stilte

Gemis

image

t binnen de troanen
dij mor nait valen
t is t stoeken van
stil verdrait

t binnen gedachten
dij smaart vermoalen
t is t verwaarken
van ainzoamhaid

t binnen de woorden
in stilte sproken
t is de leegte
dij ik besef

t binnen de vroagen
aal onbeantwoord
t is in t gemis
dat ik die tref

eltje ©

Twij menuten

Dodenherdenking

twij menuten stilte
veur dou
woarin gedachten
spreken

zwiegende herinnerns
steken
deur de ziel van de tied

twij menuten stilte
veur dou
woarin emoties
zuiken

berusten en kwoadhaid
vervluiken mekoar
in n innerlieke stried

twij menuten stilte
veur nou
woarin slachtoffers
zwiegen

n maarkboar taiken
tegen zinloos
geweld

twij menuten stilte
veur mörgen
om veur vrede
te strieden

n zwiegzoam veurnemen
dij veur elk en ain
geldt

eltje ©

Aigen rechters

Aigen rechters
n horde lu
dij nog minder
as baisten op jacht noar wild
de stilte en alles
wat lös en vast zit
schoamteloos verscheurt

wordt nait
as n koppel agressieve wilden
karakterizeerd mor
krigt voak de kwalifikoatsie
dat dij tot n traauwe
supportersgroep beheurt

t is n schaande veur n klub
as zien gepeupel uut de spelonken kropt

mit as dezastreuze gevolg
dat de verkeerde mainsstied votlopt

eltje ©

%d bloggers liken dit: