Posts tagged “sterren

Zeuvende hemel

“Wat staaist ter ja bezopen bie, kirrel. En wat kikst ja lodderg uut d’ogen. Woar hest last van. Of kikst de wereld veur n doedelzak aan?”

Buurman Jan was net over de drumpel strompeld en je konnen wel zain dat zien kop kovvie der nait hail soepel inglieden zol.

“Mien Griet het mie vannacht om kwart noa twije wakker moakt. Ik dreumde net dat ik n solotocht in mien allìnnegies muik en midden op t Zuudloardermeer genoot van de doodse stilte en de serene rust. Dou zag k in de dook Berend Botje aanvoaren kommen. Ik pakde de roeispoanen vast om hom tegemuide te voaren dou k wakker wer. Mien Griet haar mie bie d’aarms vast.

“Deruut”, zee ze, “valende steerns kieken”.

Even loater ston k mit heur in t baalkeduuster achter op t toenpad as n echte steernkieker noar valende steerns te gloepen. t Was n steernkloare nacht en mien Griet gaf mie d’opdracht om n wìns te doun dij betrekken haar op onze reloatsie. Zai wos al wat heur wìns wezen zol, zee zai.

Ik heb doar wel vief ketaaier as Maal Jan mit de kop in de nekke stoan te loeren. Nou waist woarom ik even nait mitdoun kin mit de schierste man van Grunnen. Man, ik heb n stieve nekke en dat zunder viagra. De piene trekt mie liek deur de kont noar de bainen.”

“En hest ook steerns zain?” vuig ik. “Aine”, zee buurman Jan.

“En hest ook n wìns doan?” wol k waiten.

“Joa, mor ik heb tegen mien Griet zegd dat ik gain steerns zain haar”, zee buurman Jan.

Ik tapde hom mor gaauw n kop kovvie in. k Haar wel n idee wat zien wìns wèst was. Dat kon zien Griet inderdoad beter mor nait waiten. “Kiek,” zee ik, “hier hest n kop kovvie. Dizze is vergees. In n drijsteern restaurant betoalst doar op t heden wel drij euro veur.”

Tja, vast staait dat buurman Jan de kommende tied nait de steerns van d’hemel speult. d’Eerste vioul al hailendaal nait. n Duet mit zien Griet zit ter ook nait in.

En al hailendaal nait in de zeuvende hemel…..

%d bloggers liken dit: