t Woord van d’òfgelopen week was dudelk “pekel”. Elke dag was der wel wat over “pekel” te doun: soms mit en soms zunder hoofdletter. “Pekel” mit hoofdletter brocht nogal wat ruiren te weeg, mor ook over “pekel” zunder hoofdletter hadden hail wat lu de “P” in. t Was d’aine gliepartij noa d’aander en liggoam en raive hadden der behoorlek van te lieden. Mentoal waren lu ook goud in onstuur, omreden kode rood en/of oranje wer nait op tied geven en op aandere mementen was dij der wel en bleek t overbodeg.

Vrouger haar je zokswat nait. Je keken noar boeten, staken joen doem omhoog en din wis je genog. t Gezond verstand van dou was woarschienlek veul beter ontwikkeld. t Liekt wel of t benul van lu op t heden slim aan t degenereren is. Aigen verantwoordelkhaid kinnen ze bliekboar nait meer of dij wordt nait meer nomen en as der wat mis gaait ligt t aaltied aan n aander.

En din “Pekel” mit hoofdletter. Dij was slim negatief in t nijs. Nou binnen der aaltied wel lu dij veuroordailen bevestegen willen, veuraal as t omwille van geld, senzoatsie en kieksievers gaait. Selektief winkeln kin je ja overaal. t Zegt meer over de pergrammoakers en d’opdrachtgevers as over de pekelders.

t Frappante is wel dat gainain in Nederland zunder pekel kin. Bie snijval en gladhaid ridt elk noamelk deur pekel. Wie waiten dat netuurlek, mor dij stovvels doar in de rest van t laand vast nait. Doar loaten ze zich laiver pekel in d’ogen streuen deur wat snötjongen van d’EO. Ach, elke omroup het n aigen kruus mout je mor reken.

Ain ding is zeker: veur ons het Pekel de Triple-A stoates: dus op noar Pekel-AAA!

eltje ©