Posts tagged “soamenleven

Stoat van vervaal

Doodsteek
de doodsteek
ligt op de loer
en wacht op
de goie mementen

de politiek
schept de veurwoarden
en kreëert
zulfmoordarrangementen

bloud kleurt
stroaten en
riolen stromen tot
over de raand tou vol

scènes volgen
mekoar rad op
mit veul slachtovvers
in de hoofdrol

eltje ©

Uuttocht

image
in n laand
woar hongerloon noar waarken
nait dij standoard brengt
dij as nörm geldt veur
n zekere welvoartsbeleven

ontbreken de meugelkheden
om as geschoolde kennis
en kunde te verzilvern om
zo partisiperen te kinnen
in n stabiele soamenleven

komt de bezetten
van essentsiële boanen
in gevoar omdat
hoogopgelaaiden t laand verloaten

stagneert d’ontwikkeln
veur alle achterblievers
dij slachtovver worden
van dizze dezastreuze oaderloaten

eltje ©

Raand van d’òfgrond

Òfgrond
de teloorgang
en de dood zitten
gnivvelnd en kniezend
te wachten in n failliete
baauwvaal van de soamenleven

rolstoulen van
verzwakte slachtovvers
stoan parkeerd omreden
de wil tot n zinvol bestoan
het t begeven

onder aan
de negatieve spiroalen
wachten inkommensdoalens
en biestand zunder zicht
op toukomstperspektieven

gemainten goan
te gronde omdat zörg
en veurzainens roofgoud worden
en rechtvoardeghaid uutlegd
wordt mit duustere motieven

eltje ©

Maarktwaarken

Maarktwaarken
aal blindstoarend op
finansiële prikkels
gaait d’infrastruktuur van
onze soamenleven stoadegaan
noar de knoppen

aal privatizerend van
negootsie en dainsten
is de bonuskultuur
van n dikbetoalde manager
nait te stoppen

vrouger
was op de maarkt
n gulden n doalder weerd

op t heden
wordt welwezen doar
stelselmoateg òfwoardeerd

eltje ©

%d bloggers liken dit: