Posts tagged “slachtovvers

Nooit weer?

Nooit weer?

Klik op d’òfbeelden veur d’indrokwekkende video over t gigantische aantal slachtovvers in de 2de wereldoorlog.

Nog aal…….

onbekommerd en
in de wolken wezend
leken vree en welstand
garandeerd

mor weer rollen koppen
en tanks over slagvelden
en wordt ter over rode sporen
marcheerd

Zenderpest

Pesten

op waarkvlouers
dijen doaglieks kulturen van
kwetsen en klaaineren

traaiternde kwelgaisten
kinnen doar filaain
nittjen en manipuleren

waarkende elbogen
sloeten n verbond om
aandern op te jutten

slachtovvers störten
fyziek en mentoal in
bodemloze putten

gedragsprotokollen
hebben veurspelboar
waaineg of gain effekt

want

tv-zenders teunen tal
programma’s mit doarin
veurbeelden van gain respekt

eltje ©

Vaaierletterwoord – zörg

Viefletterwoord

aal meer lu mouten
belaaid uutvoeren dat
tot in de kern doodzaik is

mor managers proaten
t kromste recht en
slechten elke hindernis

op beerputten worden
bolten draaid van t
allerdikste soort

veur slachtovvers is
leven ìnkeld nog
n dood viefletterwoord

eltje ©

Raand van d’òfgrond

Òfgrond
de teloorgang
en de dood zitten
gnivvelnd en kniezend
te wachten in n failliete
baauwvaal van de soamenleven

rolstoulen van
verzwakte slachtovvers
stoan parkeerd omreden
de wil tot n zinvol bestoan
het t begeven

onder aan
de negatieve spiroalen
wachten inkommensdoalens
en biestand zunder zicht
op toukomstperspektieven

gemainten goan
te gronde omdat zörg
en veurzainens roofgoud worden
en rechtvoardeghaid uutlegd
wordt mit duustere motieven

eltje ©

Aldel

Aldel
aan de monden van
d’eems kropt de duvel
filaain omhoog uut de hel en

snidt as n slachter mit
presizie daibe wonden
in n gezond verdainmodel

slachtovvers binnen
ten dode opschreven in n
troagisch treur- en dubbelspel

woarin de politiek mit
vaalze koarten pokert in
n twijduuster overlevenskarrousel

eltje ©

%d bloggers liken dit: