“Der komt weer n schiere tied aan. Of zo as mien Griet zegt: n minne.”

Buurman Jan was aanschoven veur zien kovvie mit kouke en vuil vot mit de deure in huus. “Zummertied, ja,” ging hai wieder. “Mien Griet vindt dat mor niks. Heur sloap het ter onder te lieden en overdag is zai nait te genieten. Din dut zai niks aans as mottern tegen mie. Volgens heur snurk ik elke nacht as n modde mit 10 biggen.”

“Tja, dat is n perbleem,” zee ik.

“Zeg dat wel,” zee buurman Jan. “Zai stöt mie elke nacht wel 10 moal wakker. Mor dat is t slimste nait. Zai het zokzulf autodidaktileerd tot sloapdeskundege. Zai wait nou zoveul van sloaperij dat elk heur inhuren kin. Der zitten vanwege de zummertied ja veul meer lu mit de tonen in d’aaske. Heur adviesburo hait ‘Nust Zacht’. Mit n knipoog noar rust zacht. Op heur advies sloap ik nou op mien zied, drink ik soavends gain potje bier meer en heb k mien kopkuzzen omhoog doan.”

“Wat, dien Griet is sloapdeskundege?” zee ik verboasd.

“Proat mie der nait van,” foeterde buurman Jan. “Ik heur d’haile dag niks aans as verhoalen over sloapholdens. Mien Griet gooit mie der dood mit en ik bin proefkniene. Ik mos gusternacht sloapen in de koninkleke holden. Volgens heur sloap je din mit n kompleet ontspannen rogholden. En eergusternacht mos k liggen in d’oapholden. Volgens mien Griet slinger je din ontspannen van dreum noar dreum. Kiek, sloapen as n meulenwieke is nait meugelk, omreden doar is ons bèrre nait braid genog veur. Doarom mout ik aankommen nacht de flamingoholden uutperbaaiern. Din mout ik mit ain bain laankuut liggen en mit d’aander optrokken. De voude van mien opgetrokken bain ligt din onder de kude van mien aandere bain.”

“Zo, doar most wel goud smui veur wezen. Ast mor gain kramp in de kuten krigst,” zee k gnivvelnd.

“Man, k zai nou al tegen de nacht op,” zee buurman Jan en hai klonk slim delesloagen. “Mor dat is t slimste nait. Mien Griet verkocht ter ook nog kuzzens bie. Volgens heur veurkom je mit heur kuzzens dat je nait meer snachts mit piene in de nekke wakker worden. Heur anti-snurk kuzzens binnen vuld mit hailzoame boukwaidedoppen, mengd mit linksomgedraaide dummiekörrels. En omdat je doarop goud uutrusten krieg je ook gain last meer van zeubranden, navvelsoezen, hoge blouddruk, zinkens in de knijen, wintervouten en braaiaarms.

Mor kom, ik goa gaauw weer noar heur tou. Ik mout heur noamelk helpen mit t vullen van heur kuzzens. Zai rekent op n verkoopsukses! Tjeu.”

Buurman Jan sjokde op huus aan. Mien òl opoe roadde mie vrouger aan dat ik mit mien doemen in d’haand sloapen goan mos. Din sluip ik volgens heur wel vief ketaaier in t uur. En zai haar geliek. Ik wer de volgende mörgen flòitpiepend wakker. Niks gain flamingoholden.

Och, as buurman Jan nou mor gain sloap in zien bainen krigt…..