Posts tagged “schuld

Onbedurven

Onbedurven
drok dounde mit vörmkes
en n schepke speult ze
op heur gemak

aargeloos en zörgeloos
kikt ze over de raand
van de zandbak

zai zugt gain wereld
van twij- en meerdailens
woar aan oordailen
veroordailen veuròf gaait

zai ervoart gain blinde hoat
woarbie t gevuil van
daipgeworrelde vijandschop
veur in agenda’s staait

zai herkent gain noar boeten gerichte
onmacht en frustroatsies
dij veurtkommen uut
rankune en wroak

zai vuilt gain òfkeer
en òfgunst jegens aandern
vanuut d’opvatten
aandermans schuld is d’oorzoak

zai kent gain veuroordailen
en ze vuilt zich
op heur gemak

zai is nait verbitterd
want ze lacht
in de zandbak

eltje ©

Dodenakker

Dodenakker

op n veld
zuzooiende zunnebloumen
ligt de stille getuge
dij de woarhaid wait

mor de leugen
struunt schoamteloos rond
tussen lieken en het lak
aan gerechteghaid

maank verwrongen stoal
speult hai n soort van
ruzzische roulette dij
alle grìnzen overschridt

d’inzet is t verdoezeln
van t bewies dat dudt
op schuld aan massamoord
en woapenbezit

eltje ©

%d bloggers liken dit: