Posts tagged “school

Buurman Jan – tikken

“Moi. Ik docht: ik kin hier wel even n kop kovvie mit kouke op de kop tikken.”

Buurman Jan was aanschoven aan de keukentoavel en zat ter al kloar veur. “Tuurlek”, zee ik, “t is die gund. En dat kin k nait tegen elk zeggen.”

“Inderdoad,” zee buurman Jan. “Man, wat dolen der toch n hampels rond op onze oardkloot. En t vervelendste is: t binnen voak lu dij t hoogste woord en de mainste noten op zang hebben. Nog slimmer is dat dat soort volk ook nog de mainste medioa-aandacht krigt. Elk dij n scheet dwaars zit kin tegenwoordeg aanschoeven aan n toavel van ain van dij leuteruutzendens. Mor t allerslimste is nog wel dat dij aandachttrekkende zielepoten gain strobraid in de wege legd wordt. t Schient dat ze heur gasten mit alle begrip veur zulfbenuimde perblemen benoadern. Kritische vroagen worden der nait meer steld.”

“Doar zegst wat,” zee ik.

“Dat zee ik,” zee buurman Jan. “Aal dij slemielen worden mit flewailen handsen aanpakt. Mor nou heb ik lezen dat n scholenkoepel in Missouri invoerd het dat leerkrachten weer korrigerende tikken uutdailen maggen. Der binnen overaal antammen dij joe t bloud onder de noagels votzoegen. En nou maggen ze doar rötjongen, dij t vertikken om heur gedrag te veraandern, as lèste redmiddel n tik geven. En nou wie t toch over ‘vertikken’ hebben, ja. Volgens mie ligt in t woord ‘vertikken’ d’oorsprong van ‘de korrigerende tik’.”

“Dat kon wel ais zo wezen,” zee ik. “t Ainegste getik dat ik mie heug is roetjetikken. Doar bin k vrouger wel ains steveg veur op de vingers tikt.”

“Hou din ook”, zee buurman Jan, “volgens mie kin t gain kwoad dat sommegen zo nou en din n beste tik op de neuze kriegen. Mor goud, ik goa weer noar mien Griet. Dou k votging was zai veur t eerst aan t boatikken. Zai is gain netuurtalent zag ik, mor ze las derover in de Glibelle en doar het ze n tik van overholden. Tjeu.”

Buurman Jan ging op huus aan en ik docht aan ain van mien vrougere leerlingen. Dij zien pabbe zee tiedens n oldergesprek: ‘Pak hom mor aan meester, hor’. Mor dat is al tieden leden.

Ach, de tied tikt deur. Traauwens, dat laidje zong dijzulfde leerling doudestieds tiedens n opvoeren van n musical van Benny Vreden. En hou!

Hai stal de show…….

Nije strenghaid

Nieuwe strengheid

provokoatsies
tiedens herdenkens
binnen bekende fenomenen
mit sympathie veur
jihadisten schoppen ze
tegen gezonde schenen

terrorisme
wordt rechtvoardegd
diskriminoatsie wordt kultuur
mit kalashnikovs
as gadgets wordt
ekstremisme n oaventuur

t demokroatische
bewustwezen is
respektloos kèl vermoord
nije strenghaid
op de scholen is
doartegen t toverwoord

mor

n dosent is volkomen
kansloos tegen strieders
van kommende uren
as thuus en buurt
de bron binnen van
verdaarvelke kulturen

eltje ©

Even weerom

Opening voormalig klaslokaal Meester Neuteboomschool t.b.v. Wijkbelang Maarsveld Stadskanaal

Opening voormalig klaslokaal Meester Neuteboomschool t.b.v. Wijkbelang Maarsveld Stadskanaal

t was nait
de geur van gel
en swait mor van
schildersvaarf op
d’ezel

t waren nait
dientjes pennen
dij zai opvrat
tot de leste
vezel

t was nait
t stee van
zeuventien moal
n klasvol en van
n kinderkoor

t was nou
t stee van knutern
en kurzussen dij
deur krimp zien
funksie verloor

eltje ©

Hollandse school

Hollandse school

over smoak vaalt
nait te twisten
wel over de zin
van voetbalanalisten

veul wordt ter hikhakt
over d’hollandse school
as was dat n soort van
stoatussymbool

doarom hier de taktiek
van de nuchtere nederlander

scoor ainvoudeg mor aine
meer as de tegenstander

eltje ©

%d bloggers liken dit: