Eltje Doddema
Posts tagged “realiteit”
Eltje Doddema
Eltje Doddema
wied vot
in n daibe duusternis
veraandern ruumte en tied
in n realiteit
van verdrongen kompleksen
n trip
noar t onderbewuste
vol symbolische kodes
van onkontroleerboare en
automoatische refleksen
angsten en
emootsies regisseren
onderdrukte verlangens en
weeromkerende beelden van
stuurloze fantazieën
n film woarin
t verminderde benul
de hoofdrol speult
in scènes dij bolstoan
van mirakuleuze magieën
dicht bie
binnen bizarre bosschoppen
woardeur je swaiten en kleumen
nait aaltied
wil j’overdag hebben
woar je snachts van dreumen
eltje ©
doaglieks
binnen der berichten
over strenge senzuren
deur kontrolerende machten
doaglieks
lees j’over regerens
dij d’invloud van media
medogenloos ontkrachten
òfwiekende mainens
worden nait
tolereerd
t benuimen van de realiteit
wordt nait
aksepteerd
t verspraaiden van infermoatsie
is deur grìnzen
nait te stoppen
veur ons binnen t
(veurlopeg nog?)
swaarde kraandekoppen
eltje ©
t wettelk recht op zörg
staait doaneg onder druk
vanwege belaaid en regelgeven
aal meer wordt kwaliteit
òfhankelk van kunde
en beschikboarhaid van d’omgeven
wetgeven en waarkelkhaid
verweven weldroa
tot realiteit
de kans is groot dat
t landelk belaaid ontoardt
in n kalamiteit
n krisis
mout je bestrieden en
zo meugelk beslechten
t wordt zörgelk
as dat ten koste gaait
van gezondhaid en rechten
eltje ©
KOPSCHRABERIJEN 