Eltje Doddema
Posts tagged “poetin”
Westelijk produkten worden in de supermaarkten in Rusland aal meer betuun. Nou overweegt de Ruzzische regeren ook nog om d’invoer van o.a kondooms te verbaiden.
n Aigenoar van n kondoomwinkel in Moskou zegt doarover: „Wie bevelen ze nait aan. We verkopen ze as ballons.”
t zoad van
hoat en agrezzie
ontkiemt op
d’oekraïnse dodenakkers
en de gewazzen rötten vot
in n woas van leugens
en bedrog
de rol van
de machtselite
wordt zichtboar as
in t baalke duuster doodskisten
groaven vullen ten taiken van
betrokkenhaid bie
d’oorlog
niks is
wat t liekt en
wat de propeganda beweert
mor wel wordt
zo misdoad en
geweld legitimeert
eltje ©
Foto: Reuters
Mars voor de Vrede
t binnen gebloakerde
legertrucks as bewies
dat woarhaid
n leugen is
t binnen de troanen
van noabestoanden
dij op kerkhoven
stromen om t gemis
t is t gif van
propaganda
dij lu aanvret en tot
zombies muteert
t is de journalist
en t oppozietsielid
dij men systemoatisch
molesteert
mor
nait elk
is ontvankelk veur
hysterisch patriottisme
nait elk
wil drogeerd wezen deur
misvörmd realisme
eltje ©
Foto: AP
de rol van de
machtselite wordt zichtboar
as d’eerste doodskisten
in t twijduuster
groaven vullen
en de dood
slachtovvers òflevert van
filaaine missies dij
in n dikke dook
woarheden verhullen
eltje ©
