Posts tagged “oordelen

Onbedurven

Onbedurven
drok dounde mit vörmkes
en n schepke speult ze
op heur gemak

aargeloos en zörgeloos
kikt ze over de raand
van de zandbak

zai zugt gain wereld
van twij- en meerdailens
woar aan oordailen
veroordailen veuròf gaait

zai ervoart gain blinde hoat
woarbie t gevuil van
daipgeworrelde vijandschop
veur in agenda’s staait

zai herkent gain noar boeten gerichte
onmacht en frustroatsies
dij veurtkommen uut
rankune en wroak

zai vuilt gain òfkeer
en òfgunst jegens aandern
vanuut d’opvatten
aandermans schuld is d’oorzoak

zai kent gain veuroordailen
en ze vuilt zich
op heur gemak

zai is nait verbitterd
want ze lacht
in de zandbak

eltje ©

Wankel evenwicht

Gaswinning
as
groaperghaid
de mìns verblindt
worden lu snel
minder ainsgezind

binnen oordailen
voak persoonlek kleurd
en is t mit soamen
verdroagen gebeurd

as
n geldwolf doolt
over klaai en zaand
kriegen frustroatsies
hail gaauw d’overhaand

strieden dörpen
fanetiek tegen aand’re lokoalen
willen aalbegeren
de prooi binnenhoalen

redelkhaid is
veurgoud verdwenen

t proses zit m
bliekboar in de genen …..

eltje ©

%d bloggers liken dit: