Posts tagged “ondergeschikt

Big Brother

Big brother

loerende lenzen scannen
doaglieks rondom aal
t goud en t fout

onzichtboare ogen spioneren
en zenden beelden
noar de cloud

anonieme servers leggen
ongegeneerd t doun en
loaten vast

privacy is n leeg begrip
en wordt legitiem
aantast

eltje ©

Moalstroom

Moalstroom
t verleden
bepoalt dails
de toukomst dij je
as aarvenis vrijwilleg of
opdrongen nait waaigern kinnen en

dij net as
welvoart en welwezen
as kommuniserende voaten
mit mekoar verbonden binnen

t heden
wordt mit beïnvloud deur
politiek en finansiële maarkten
woaronder perspektieven
meedogenloos bezwieken en

instabiele soamenlevens
wankeln onder wetten
dij rechtveerdegd worden
deur vervoelde statistieken

bewust
of onbewust
speult elk n aigen rol in
manipuloatsie- en verdainmodellen

woarbie

respekt
en transperantsie
onderschikt binnen aan
opgesmukte suksestabellen

eltje ©

Pries

IMG_1662in n twijduustere wereld
woar grìnzen vervoagen
tussen woarhaid en leugen
worden winnoars helden
wordt gespeulde onschuld
meedogenloos vermoord

in n sinistere wereld
woar ìnkeld knikkers tellen
woar schien n masker dragt
wordt sukses verguld
in medailles en roem
onstaarvelk verwoord

in n lugubere wereld
woar bloots rezeltoaten gelden
van glories en saldo’s
rakt de mìns verstikt
is welwezen ondergeschikt
aan winst en belangen

in n genoadeloze wereld
woar bloud stroomt woar t kin
woar n deal besmet mit epo is
kriegen lu de speulen
van doping en bedrog
omdat ze swait verlangen

eltje ©

%d bloggers liken dit: