Posts tagged “olderdom

Welwezenloos

Welwezenloos
dichte deuren
van lege tehuzen
worden symbolen
van zörgzwoartepakketten
dij t recht op n stee blokkeren

levenloos stoan
straks aal meer panden
woarin ooit vol
touwaaiden zörg was
tot baauwvalen te kreperen

t haart is vot
sneden uut t respekt veur
hulpbehuivendhaid en olderdom

geld bepoalt
mit femilie of buren of je
partisipoatsie wel vuilen as riekdom

eltje ©

Beschaauwen

Beschaauwen
d’eerste smok
t eerste doetje
d’eerste laifde
vol vlinders in t lief

aal eerste moalen
mit intense emootsies
mit nait t gevuil van
vluchteg tiedverdrief

mor tied vervlogt
mit de joaren aal vlogger
want leeftied
bepoalt olderdom

zo weegt op n duur
dij waitenschop swoarder
en ervoart nait elk t
as levensriekdom

toch het older worden
ook hail veul veurdailen
vergriezen is nait bloots
n indikator van verval

veul huft nait meer
woar j’ooit noar verlangden
beschaauw doarom leeftied
gewoon as n abstrakt getal

eltje ©

%d bloggers liken dit: