Posts tagged “muziek

Buurman Jan: jodelahiti

“Wat bist ja vroug vandoage.”

Buurman Jan was net aanschoven aan de keukentoavel veur zien kop kovvie en hombe kouke.

“Joa, mor dat het n reden,” zee hai. “Mien Griet begunt tegenwoordeg elke mörgen mit n jodellaid. Vanmörgen was dat ‘Auf dem Berg, da steht a Hütterl’ Zai het noamelk lezen dat zingen stimulerend waarkt. Ik von de leste tied al dat zai smörgens oardeg laank onder de douche ston en ik heb op n gegeven mement even stiekem deur n glieve van onze douchdeure glopen. En joa hur, doar ston mien Griet. Poedeltjenoakt en mit de stromende douchekop as mikrofoon veur zok te jodeln.”

“Kin zai din wel zingen?” vruig ik veurzichteg.

“Nee man, mor dat duurf ik nait tegen heur te zeggen. Dat is ja nait goud veur d’harmonie. t Schient dat je deur te zingen minder strezzeg worden. Teminnend dat zegt mien Griet. En as je dat onder de douche doun staarkt t ook nog joen zulfbewustwezen. Want mit n gobbe wotter derbie waarkt t dubbelop. Boetendes is t goud veur t haart.

Mor dat is t slimste nog nait. Zai wil nou dat ik elk moal mit jodel. Want as wie mit ons baaident touglieks zingen sloagen onze haarten op n gegeven mement persies in de moat. Net as tiedens onze knientjesdoagen vot noa ons traauwen. En n gezoamelk haartritme is weer goud veur de bloudsomloop. En nou wil zai ook nog vioulles nemen, want t bespeulen van n instrument schient goud te wezen veur d’ainmoud en t soamenspul tussen pokkel en benul. Stel die toch ains veur: elke dag dat getjilp op zo’n jammerholtje. Man, ik mout ter nait aan denken.”

“Nou, doar bist mooi kloar mit. Elke dag dat gefiedel en gejodel aan de kop,” zee ik mit gespeuld leedvermoak.

“Tja, mien Griet zee dat d’evoluutsie van ons mìnsen hieraan ten grondslag ligt. Vrouger konnen ze in de wildernis overleven omdat ze alle geluden votdoadelk herkennen mozzen. Lu’s leven hong der dou vanòf of ze onderschaaiden konnen of t n geluud was van t ruzzeln van n doedhoamel of dat t de voutstappen van n schiere deern, n dikke bere of van n swaarde panter waren. Mien Griet kin mit heur meziek ook veul beter funksioneren. Zai wil zok doarom ook nog abonneren op Spotjefaai. Doar wil ze din veur elke gemoudstoustand n apaarde pleelieste soamenstellen. Dij wil ze din mit n app òfspeulen op heur buutsmobieltje en beluustern mit heur bloetoet-oordoppen. Zo kin zai din tussen de spruutjes en waalze bonen op de meziek van bieveurbeeld ‘Die Jodeljungs’ pozitief deur onze ploatselke super swieren. Want mien Griet is gek op n drijkwartsmoat. Meziek is d’ainege drug dij gain nevenwaarkens het, zegt zai. Nou ik zeg die dit: dat is nait woar. Ik wor stoapelgek van heur meneuvels. Nou tjeu. t Is zo stoadegaan tied veur mien jodelduet.”

Vergisde ik mie of heurde ik hom achter t huus zingen of jodeln ‘Ich plakke ein dirndl hinter das behang’.

Nou ja, gelokkeg is t wel of nait herkennen van jodelderij veur mie nait van levensbelang. Jodelahiti…….!

Gekkenwaark

Stellen ie joe ook wel ais de vroage in wat veur wereld wie ainglieks leven? Ik wel. Veuraal as k per ongelok zap langs ain van dij big brother, big diet of big tits pergrammen. t Leste songfestival is ook in ain van dij kwedelshows braiduut evalueerd.

En ook t Dagblad muik netuurlek melden van de “songcontest” in Rötterdam, inkluzief de vermainde snoeverij. t Was n groot sukses, mor wie kinnen nou weer overgoan tot d’orde van de dag, ook wat meziek betreft. Nou is t mit meziek net as mit eten en mode: nait elk proemt t zulfde. En dat is mor goud ook.

Der binnen genres bie woar ik nog gain menuut noar luustern kin. Mit rap heb k bieveurbeeld hailendaal niks. De veurnoamste reden is dat mie t milieu rond veul van dij rappers nait zint, net as veul van de vraauwonvrundelke teksten. Noamen as Boef en Droef doun de rest.

Dit borrelde noar boven dou k n bericht las over rapper Kleine. Veur de dudelkhaid: hai hait gain Lul mor Lil. Dat eerste zol e best wezen kinnen, omreden hai het zien leste scharrel n tjijs en n diedel verkocht. t Liekt ter meer op dat t n pak op pìnze was. Hai was mit heur op Ibiza en zat in ain van de luxe suites in t net nije Oku hotel. t Wicht meldde zok midden in de nacht bie de resepsie. Heur bloud droop woar t nait goan mos.

t Liekt wel of de rapwereld, mor ook de schoare volgelingen, n degenererende generoatsie oetlullen verpersoonlekt van omhooggevalen onbenullen. Toch verdainen de “betere” reveloars kappen geld, zodat ze broezen en flaneren kinnen in heur blitse bolides. Want dat is woar zai heur stoates aan verlainen: poedies en Maserati’s.

t Zol mie niks verwondern as dij Klaaine mit of zunder zien avvekoat in ain van de kommende proatshows onder de spots ploats nemt. Want elke gek dij veur n kamera zien boksem zakken let komt tegenwoordeg op tillevizie.

Ik wait nou al wat dat wordt: stereopenis. Wat dat is?

Gelul in de ruumte……..

Grunnen

Na veel negatieve berichten over de provincie Groningen en verschillende liedjes over de aardbevingen werd het weer tijd voor een lied (in het Gronings) met een positieve boodschap.

Klik op de foto om het lied te beluisteren (en te bekijken) via Youtube.

Grunnen

GRUNNEN via YOUTUBE

Gratis downloaden (en luisteren) kan via SOUNDCLOUD. Klik hiervoor op onderstaande afbeelding.

Gratis download GRUNNEN via SOUNDCLOUD

GRUNNEN

Ook al trilt de grond van ons bestoan
onz’aigenweerde is vast as stoal.
Ook al is nait elk mit t löt begoan
nuchterhaid kenmaarkt ons verhoal.

Ook al leven we hier mit angst en beven
wie wonen hier om meer as doezend redens.
Ook al worden we soms tot woanzin dreven
elke mörgen vindt kracht uut veul verledens.

REFRAAIN:
Boven Grunnen, boven Grunnen verweven zich wolkenluchten
mit zwaarmen vogelvluchten tot n waarme kleurenpracht.
In Grunnen, in Grunnen worden klanken symfonieën
worden beelden fantazieën zodat n kind noar mörgen vragt.

Ook al is dit t hoge noorden
ons leven is op de toukomst richt.
Ook al bruken we nait veul woorden
onze toal is oprecht en slicht.

Ook al binnen der veuroordailen
wie leuven staark in onze aigen kracht.
Ook al zugt nait elk de pronkjewailen
ondanks dat wordt gain mìns minacht.

Grunnen - wolken

GRUNNEN

REFRAAIN:

Eltje Doddema ©

%d bloggers liken dit: