Posts tagged “moederdag

Gizzen

t Wordt vandoage n schiere dag en der binnen noar verwachten veul lu bie t pad. t Is ja “moederdag”. Mor ook de stranden binnen vast slim in trek. Net as de winkel- en toencentra en de zulf-negootsieknuter-toko’s. Zallen aal dij lu de “anderhaalve meter regel” aan heur steveltje lappen?De gemoudern rond Feyenoord-Ajax lopen in elk geval weer hoog op. Wat dat betreft veraandert ook Corona doar niks aan. Zulfs vandoalen en kriminelen worden in de media nog steevast “supporters” nuimd. Der zellen noa aal dij mieghommelnustevenementen vast nog wel meer van dij doagen volgen.

Ook binnen der weer anti-Corona-moatregel demonstroatsies. d’Aanhang van dij dwaarsliggers wordt onderhand filaain infiltreerd deur lu dij onze demokroatsie t laifst slopen willen. Solidariteit is veur dat soort lu n onbekend en vies woord.

Nou is inderdoad laank nait alles koosjer in de wereld. En dat ter lu binnen dij gewaitenloos t slechtste mit joe veur hebben is bekend. d’Historie het ons dat leerd. Mor der schienen aal meer lu rond te dolen woarbie t historisch benul slim ondermoats is. Ook bie veul anti lockdown demonstranten. Aans is t nait te verkloaren dat ter zoveul steukeld wordt om old en jong, gezonden en ongezonden, benullen en onbenullen, witten en swaarten tegen mekoar op te zetten.

Corona teunt ons in wezen t defekte kompas van t mìnsdom in de deurzichtege spaigel van pleksieglas woarin wie zain kinnen dat wie ainglieks leven op n lutje riggel van beschoafdhaid. Dat schient bie hail veul lu nait deur te dringen. t Volk het t te drok mit aigenbelangen.

Wat dit veur gevolgen hebben zal? Doar wordt hier en doar noar gist. Elk wil tegenwoordeg ook ja geern aigen broden bakken. En ik? Ik heb gain baktalent. Doar bak ik niks van terechte.

Of ik nou mit de gebakken peren zit? Ach, doar mag je noar gizzen…..

%d bloggers liken dit: