Posts tagged “meedogenloos

Seniorenleed

Seniorenleed

t aalzaind oog observeert
zichtboar meedogenloos
dag in dag uut
hedendoagse tavverelen

stiegende grondstofpriezen
en gruiende infloatsie
zetten oldern aan
om te stelen

mit n gezicht vol schoamte
boegen ze zich veurover
mit in gedachten
heur zunege aow

mor ze willen
heur klaainkind
stommegeern wat geven
zo as elk dat vrouger dee

eltje ©

Moalstroom

Moalstroom
t verleden
bepoalt dails
de toukomst dij je
as aarvenis vrijwilleg of
opdrongen nait waaigern kinnen en

dij net as
welvoart en welwezen
as kommuniserende voaten
mit mekoar verbonden binnen

t heden
wordt mit beïnvloud deur
politiek en finansiële maarkten
woaronder perspektieven
meedogenloos bezwieken en

instabiele soamenlevens
wankeln onder wetten
dij rechtveerdegd worden
deur vervoelde statistieken

bewust
of onbewust
speult elk n aigen rol in
manipuloatsie- en verdainmodellen

woarbie

respekt
en transperantsie
onderschikt binnen aan
opgesmukte suksestabellen

eltje ©

Chipt

Chipt
aal meer
van t leven
wordt stiekem registreerd
en as bruukboare data uutlezen

aal dichter
op t vel
leggen sensoren vast
wat privacy hait te wezen

t oog
achter Google Glass
is meedogenloos schaarp
mit kèl grèlle kleuren

n identiteit
wordt gewaitenloos stolen
in n wereld
vol cyberdeuren

om reden
van vaaileghaid en van gemak
willen we vrijhaid wel bepaarken

gevolgen
binnen groot as we t veur aaid verlaizen
en wie dit vuilen en maarken

eltje ©

Pries

IMG_1662in n twijduustere wereld
woar grìnzen vervoagen
tussen woarhaid en leugen
worden winnoars helden
wordt gespeulde onschuld
meedogenloos vermoord

in n sinistere wereld
woar ìnkeld knikkers tellen
woar schien n masker dragt
wordt sukses verguld
in medailles en roem
onstaarvelk verwoord

in n lugubere wereld
woar bloots rezeltoaten gelden
van glories en saldo’s
rakt de mìns verstikt
is welwezen ondergeschikt
aan winst en belangen

in n genoadeloze wereld
woar bloud stroomt woar t kin
woar n deal besmet mit epo is
kriegen lu de speulen
van doping en bedrog
omdat ze swait verlangen

eltje ©

%d bloggers liken dit: