Posts tagged “liefde

Buurman Jan – Haide nacht

BUURMAN JAN – haide nacht

Buurman Jan was drok dounde mit t nuttegen van zien hombe kouke en kovvie. En zo as gebrukelk haar e zien bekje ook dit moal weer in de schieterij.

“Ik heb bie boer Diekstroa, hier bie ons achter op Veenweg, veur vannacht n heubulde rezerveerd. Kiek, bie mien Griet jeukt t op dit mement elke nacht aan heur tonen en din wait ik dat zai last het van heur hotmonen.”

“Hormonen bedoulst zeker,” verbeterde ik hom.

“Nee, vanwege de hitte worden heur hormonen oververhit en binnen din slim hot,” ging buurman Jan verder. “Dat is Engels moust waiten en betaikent ‘hait’. Vandoar dus ‘hotmonen’. Zai is der nog mit noar dokter wèst, mor dij zee dat t de leeftied was. Ze mos der mit leven leren. Tja, doar kin je ja niks mit. Nou ja, vanwege d’hoge temperaturen dij wie op t mement hebben heb k heur doarom nuigd veur n romantische nacht in t heu. Aine in d’open locht achter op t haim bie boer Diekstroa.”

“Paas mor op. De kans bestaait dat de jeukerij din nait ìnkeld bie dien Griets tonen blift,” nittjede ik.

“Nou, dat komt wel goud. Boetendes, dit kin je beter doun as hait worden op n dampende datingsite,” zee buurman Jan. “Swoagertje Eppo is doar lèstdoags maal mit votkommen dou hai mit ain van zien kontakten beeld-scharrelderij kreeg. Hai is deur zien Elsie overlopen dou hai dounde was mit onderpokkelfoevelderij. Dat het mie toch n rebulie geven. Nee, t leven in natura beleven gaait ter mit deur.”

“Vandoar bloot in d’heubulde bie boer Diekstroa. As je t vuur mor nait te hoog oppoken. d’Heubulde kin joe wel in braand vlaigen,” zee ik.

“Wees mor nait benaauwd,” vervolgde buurman Jan. “Ik heb mien hormonen volledeg onder kontrole. Mor kom, ik mout nog even wat ditten en datten hoalen veur onze picknickmand. t Zal ons vannacht aan niks mankaaiern. Tjeu.”

Buurman Jan ging floitend op huus aan. Sommegen worden mit n vlam in bèrre blied. Aandern sweren bie n romantisch etentje bie keerslicht.

Ach, n haide nacht in n heubulde het toch ook wel wat…..

Dreugkloten

Dat ons laifmeneer vrumde kostgangers het bliekt elke weke weer. Noast löslopende verwarde lu in stroaten en stegen bliekt dat ter aal meer mafkezen vlaigen. In de ruumte wel te verstoan. Tussen twij vleugels. Doar schient noamelk veul agrezzie ploats te vinden. Per joar zörgen n lutje doezend malloten veur overlast.

Ain van d’oorzoaken kin wezen dat ze dailnomen hebben (of nog dailnemen) aan onze volkssport nummer aine: voetbal. Onderzuik van n Schotse akkedemie het noamelk uutwezen dat je vanwege t koppen d’hazzens beschoadegen kinnen. Joen benul kin doar op termien slim seupel van worden. t Is dus ook nait vrumd dat aal meer lu de wereld aankieken veur n doedelzak. Sommegen zeggen zulfs dat de mìnshaid der in t aalgemain nait lozer op wordt. Vandoar t woord “mìnsDOM” vanzulf.

Nou binnen der lu dij de buie hangen zain en al drok dounde binnen mit t klonen van levende hoave. Ze willen redden wat ter nog te redden vaalt. Der wordt din ook drok experimenteerd, ook op t terraain van seks. Dammeet kin je mit n robotje op elk tiedstip van de dag joen lusten botvieren. Ik hoop wel dat je dij, deur joen stem aangestuurde, Dollie of Mollie goud programmeren. Aans kon t wel ains op n flottjeboudel uutlopen.

Mor goud, niks is te gek tegenwoordeg. t Schient zulfs dat ter lu binnen dij van heur dierboare n gedreugde tepel of veurhoedje op t nachtkassie liggen hebben. Tja, dat liekt mie ainglieks niks veur dreugkloten.

Nou hoop ik nait dat ik joe mit dat lèste op gedachten brocht heb….

%d bloggers liken dit: