Posts tagged “leegte

Vrij

Vrij veur aaid

t glìnne licht vervoagt
in t twijduuster
en gaait over in
n swaarde leegte
woarin niks meer is en
woar weerom
gain optie is

klemd tussen wanhoop en
uutzichtslooshaid wordt
vanuut d’iesdern greep
opluchten ervoaren as
de defintieve keus
t voltrekken is
van t ìndvonnis

eltje ©

Leegte in dien ogen

Welwezenloos

LEEGTE IN DIEN OGEN  (MP3)

noa weer n dag in n aigen wereld
stommelst noar berre tou
van aal dij stemmen van aal verbeeldens
waist asmis nait meer hou

t liekt dast t gelok vinst in geluden
in beelden en in gedachten
bist op dien aigen menaaier tevree
zitst op niks te wachten

doolst in n wereld zunder doul
gain besef van ainzoamhaid
t is drok in dij wereld aibels klaain
nait vergeten dat is der nait

aal dij bloumen in dien aigen kleuren
stoan reukloos uut te bluien
dij kleuren binnen flets
doe bist vergeten hou tudeltoantjes gruien

vandoag is mörgen mörgen is guster vrouger is t heden
onrusteg zuiken dien tiedverdrief vinden kinst vergeten
veur die tikt klokke n aigen tied dien woarhaid is nooit logen
wat mie verdrut en aal weer stekt is d’leegte in dien ogen

der binnen zo veul tegenstriedegheden
in aal dien doun en loaten
veul onbegrip zit in dien proat
hest t nait in de goaten

veur die is wereld warreg
dij is nait in balans
dien zuiktocht is ain zunder vinden
veur die is der gain kans

eltje ©

Leegte

Leegte

tiedens de raais
vol toukomstdreumen
brekt de hel
haardvochteg in

ale plannen
veur nou en loater
hebben in t duvelsbos
gain zin

tussen geleuf
en nait geleuven
stridt vaals licht
mit duusternis

tussen begun
en ìndloos droagen
smaart de last
van groot gemis

eltje ©

%d bloggers liken dit: