Posts tagged “leeftijd”
Volgens n bekìnde internist, gerioater en gerontoloog kinnen we in de toukomst wel 130 joar old worden. En as t n beetje mitzit wellicht nog older. Veurwoarde is wel dat we gezond leven en holpen worden deur medikoatsie en voedingssupplementen.
Zai je t al veur joe lu om op dij menaaier joen leven te verlengen? Zai je joezulf al datteg joar mit n rolloator deurseupeln mit elke dag deuzen en potten vol pillen en poeiers dij je doaglieks slikken mouten?
Kiek, vrouger haar je zaalve van opoe Deldog en as t kneep en weer kneep kon je ook nog wat Hofmandruppels opslobbern. Mor tegenwoordeg is t ain en aal synthetische rommelpot. Ze doun der nait veur niks biesloeters bie woarop de vervolgschoades vermeld worden. Nee, geef mie din mor wat Hoarlemmer eulie.
Hou din ook, mit viteminen en mineroalen kin je volgens de nijmootse kwakzaalvers makkelk de honderd hoalen. Big Pharma zörgt wel veur de kapsules en bioaktieve stovven. De multivitaminepillen worden joe mit drones veur de deure kwakt. En vlak dat nait vot: ze worden in t liggoam ook nog makkelker opnomen as gakbalen, spruutjes, siepels en nuim mor op wat veur normoale eterij.
Ain ding is zeker: d’olle dag zugt ter din hail aans uut. Mor of olle bokken din nog stieve horens hebben is mor de vroag. En onzeker is ook of aine op loatere leeftied nog wel d’olste braiven hebben zal. Zeker is wel: je kinnen vertellen over joen grieze oldhaid.
Boetendes komt t verstand mit de joaren en kin je laank genieten van joen olle gewoonten. En as ze joe loater in t bejoardenhuus as t olle peerd van staal hoalen en joe in de rekreoatsiezoal in d’ol zörge zetten, kin je doar ol Jan en jonge Jan uutstokken dat ze t op n ol fietse leren mouten.
Traauwens: waiten ie dat t vanolds zo is dat ain older beter tien grommen groot brengen kin as dat tien kinder ain older deur de tied helpen? Dat blift ook zo en dat wordt vast nait beter. Ook in de toukomst heb je kans dat d’ollen as old voel in n verpleeghuus dumpt worden, omreden de zörg veur heur wordt aal duurder.
En gebreken?
Zat…….
Lestdoags muik t Dagblad melden van n onderzuik woarbie onderzöcht is wanneer je t beste van bèrre goan kinnen. t Ideoale tiedstip veur twintegers is 09:30 uur. Dattegers binnen beter uut as ze om 08:10 uur de vouten in de muilen steken. Vattegers doarentegen kinnen beter om 07:50 uur de dekens op zied gooien.
Veurdat je uut joen nust kommen mout je der netuurlek eerst opkropen wezen. Twintigers kinnen dat t beste om 01:00 uur doun, dattegers om 23:40 uur en vattegers om 23:30 uur.
Wos je dat ter n ideoal mement op de dag is veur n goie vrijpartij? Je zollen meschain denken dat dat soavends vlak veur t sloapengoan is. Mor n waitenschopper is tot aandere konkluzies kommen.
Veurdat k joe lozer moak is t goud om te waiten dat vrijen n leugenachteg ambacht is. Woarom? Nou, vrijen is zachies proaten en haardop laigen. Bedenk veuròf ook dat d’ain mit de mouder en d’aander mit de dochter vrijt.
Nou is t zo dat, as t ter van komt, de mainste lu eerst even op heur wekkertje kieken. Je mouten de tied ja in de goaten holden, nee din? Mor vergeet veuraal ook nait joen innerleke klokke. Dij geft nait veur elk dezulfde tied aan. Uut onderzuik is noamelk bleken dat twintegers t beste seks hebben kinnen om 15:00 uur, want din hebben dij heur energiepiek. Veur dattegers is dat om 08:20 uur en veur vattegers om 22:20 uur. Bliekboar is dat op de menuut òf vaststeld.
t Bliekt ook dat veul manlu smörgens rond n uur of elven tiedens heur waark wat inkakken. Vandoar dizze road: vuil rond dij tied even in joen buutse om te voesieknakken. Din zit je doarnoa weer op t hoogtepunt van joen presteren.
Veurdat je nou reageren: ook dit het onderzuik uutwezen.
Mien ol opoe haar dat, wied veurdat ter onderzuik noar doan is, al laank in de goaten. Zai bepoalde zulf heur tieden. t Vraauwvolk is ook ja boas, doar woar rook veur de wind aangaait, nee din! Zai zee aaltied: “As t joe jeukt aan kop en tonen, hejje last van joen hormonen.” Tja, en dat kin elk mement van de dag wezen.
Mocht je nou binnenkört op vrijersvouten goan, loat joen vrijer din nait aan de deurknobbe hangen. Nuig hom of heur in joen vrijerskoamertje en zörg veur n natje en n dreugje. Doar hejje vast gain vrijerspotje veur neudeg.
Nou heur k joe zeggen: “Mien tied wordt in dien epistel ja nait vermeld.”
Ach, komt tied, komt doad……
Eltje Doddema
Eltje Doddema
Eltje Doddema
Eltje Doddema
Eltje Doddema
Eltje Doddema
Eltje Doddema
