

mit argusogen
wordt uutkeken noar
t mement dat de deus
van pandora open gaait
en griekenland wel of nait
d’eurozone verlet
as de gaist
uut de vles is
brekt ter n titoanenstried lös
en wordt ter in duustere
finansiële labyrinten
grof pokerd en wed
mor as je
goden verzuiken
zal chaos
de mìnshaid trevven
omreden
t kwoad vindt
d’achilleshiel eerder
as dat we besevven
eltje ©
noa n aanslag
en de zoveulste
gewelddoad
vellen digitoale beulen
vlot n doodvonnis
want as angst
transformeert in
blinde hoat
wordt ter oordaild
zunder faaitenkennis
vrijhaid
balanseert op n
riggel dij ainglieks
hail slim smaal en
seupel is
vertraauwen
verdampt en
wantraauwen waast
bie elke
nije krisis
eltje ©
verzekerns worden uutkled
tot op t hemd en
alom woart waarklooshaid
n gezondhaidskrisis
ligt op de loer aal
onder politieke verantwoordelkhaid
drastisch bezunegen
het fatoale gevolgen
veur de gezondhaid van jong en old
as politisi
dij realiteit negeren
wordt de toukomst kèl en kold
statistieken teunen din
schrikboarende beelden
van vervaal en open wonden
deur t onbetoalboar worden
van neudzoakelke hulp
binnen mìnsenrechten din schonden
eltje ©