Posts tagged “krisis

Grexit

Grexit

mit argusogen
wordt uutkeken noar
t mement dat de deus
van pandora open gaait
en griekenland wel of nait
d’eurozone verlet

as de gaist
uut de vles is
brekt ter n titoanenstried lös
en wordt ter in duustere
finansiële labyrinten
grof pokerd en wed

mor as je
goden verzuiken
zal chaos
de mìnshaid trevven

omreden
t kwoad vindt
d’achilleshiel eerder
as dat we besevven

eltje ©

Uut balans

image

noa n aanslag
en de zoveulste
gewelddoad
vellen digitoale beulen
vlot n doodvonnis

want as angst
transformeert in
blinde hoat
wordt ter oordaild
zunder faaitenkennis

vrijhaid
balanseert op n
riggel dij ainglieks
hail slim smaal en
seupel is

vertraauwen
verdampt en
wantraauwen waast
bie elke
nije krisis

eltje ©

Krisismanagement

Krisismanagement

as der aal voaker
en noadrukkelker
n point of no return
benuimd wordt en
dij in urgentsie
stigt mit stip

worden d’obstoakels
om over t dooie punt
hìn te kommen
vakkundeg sloopt en
wordt bittere noodzoak
t sleudelbegrip

eltje ©

Strand

Strand

wor je
deur de malaize
n marionet woar
elk aan trekt

din worden der
rond t geutgat
van de kanslozen
verwachtens wekt

elk dij
in bikini lopt
wordt mit argusogen
aanglopen

op noaktstranden
wordt t drok omreden
n tenue kinnen lu
nait kopen

eltje ©

Zörg-ontzekern

Zörgontzekern
verzekerns worden uutkled
tot op t hemd en
alom woart waarklooshaid

n gezondhaidskrisis
ligt op de loer aal
onder politieke verantwoordelkhaid

drastisch bezunegen
het fatoale gevolgen
veur de gezondhaid van jong en old

as politisi
dij realiteit negeren
wordt de toukomst kèl en kold

statistieken teunen din
schrikboarende beelden
van vervaal en open wonden

deur t onbetoalboar worden
van neudzoakelke hulp
binnen mìnsenrechten din schonden

eltje ©

%d bloggers liken dit: