Posts tagged “kiev

Krim-poker

Krim-poker
aan de speultoavel
dut de speuler
filaain geregiseerde zetten
mit as ainegste doul om
as verlaizer uut de stried te kommen

de winnoar
viert t sukses
dij hom veuropgezet
gund is mor woarbie
de zegekreten al gaauw verstommen

t is vanwege hoogspel
vanachter de coulizzen
woarbie de pokerface zwigt

zien ainegste doul is
dat hai strategisch
verloren terraain weerom krigt

eltje ©

Oekraïne

Oekraïne
op t maidan-plaain
gruit de massa gestoag
en loaten jong en old
heur onvree maarken

soamen n doul
vol overtugen
mit zwaaiende vlagen
dij binden en staarken

n gewoapende macht
verkracht de rechten
en plet de toukomst
van klaain en groot

fatoale sentimeters
kèl metoal laaiden
kreunend en kaarmend
tot n wizze dood

eltje ©

Kiev

Kiev
t sweerd van Damokles hangt
boven t vuur en de waalm
van n swaarde nacht woarin
demonstranten en plietsie
heur machtsstried uutvechten

t is n konflikt woarin
foto’s in scène zet worden mor
woar beelden toch weergoaves binnen
van n vraide waarkelkhaid van
mit vouten vertrapte rechten

spreekkoren gaalmen en
braandbommen van
vermomde bivakmutsen vlaigen
over brandende barrikoaden
as protesten tegen eksessief geweld

t is n stried dij wieder gaait as
de macht over n plaain
en woar t vergoten bloud
van aigen weerden en belangen
gutst en gain gouds veurspelt

eltje ©

%d bloggers liken dit: