Op de dag dat veul daaierlaifhebbers wat ekstroa’s over hadden veur heur twij- of vaaierpoter(s), las k n schietverhoal in t Dagblad mit as onderwaarp: d’ekologische pootòfdrok (lees: stront) van huusdaaier. Dij wer mit schietgemak vergeleken mit t aantal gereden kilometers in n SUV. 

Volgens de publisist vervoelt op joarboazes n peerd net zoveul as 21.453 kilometer rieden mit zo’n SUV, n kadde 1413 kilometer en n hond 3677 kilometer. Om van joen hamsters, knarries en schietdoeven nog mor te swiegen. Mit schietgemak kin je zulf vervast nog wel meer schieterds bedenken. 

Ain ding is zeker: n SUV is n schietding. Net zo as n schiet-op-e-dele, n schiet-op-d’hakken, n schiet-op-bèrre en aal t aandere schietgoud. Aal mit aal vindt de beste man dat t gain schietscheterij is. Volgens hom is de wereld ain grode schietkare. En de stikstofproduksie van joen schietpoedel is volgens hom gain schietbeetje. De belasten van n schietkerel en van n lutje schiet-in-de-boksen werden traauwens nait vermeld. 

Mochten ie nou slim vergrèld worden van t schietvernien van zo’n milieuschieterd, hol joe in. Zeg veuraal nait: “Schiet die toch uut, man!” Veur dat je der op verdocht binnen wor je oppakt. Je mouten zo stoadegaan ook ja wel schietensbenaauwd worden as je joen boksem zakken loaten willen.

Mocht je toch n gang moaken mouten noar t schiethuus vanwege joen schieterij, nog even dit. Je vuilen joe schietgelokkeg as dij schietboudel weer over is…..