Ons soort volk

WIE – ZAI

de kultuur bie
banken is der aine van
gesjoemel
en bedraigen

de bankidentiteit
bepoalt de moate van
oneerlekhaid
en laigen

subtiel
en onbewust speulen
din mentoale prosezzen

dij bewust
uutgruien tot
boetensporege eksezzen

eltje ©

as je
n kulturele identiteit
opaaisen en
òfdwingen willen

stoa je
nait open om
joezulf aan te pazen
aan verschillen

eltje ©

vastlegd
deur t oog
aan de veurkaant
verradt t spaigelbeeld
d’identiteit

n foto
dij meer zegt
as doezend woorden
teunt n imago
vol originaliteit

n dagbouk
vol beeldtoal
wordt kreëerd uut eerns
of veur poelegrap
en oardeghaid

zulfpertretten
mit gebelskoppen
of zunder effekten
worden vastlegd
veur d’aiweghaid