Eltje Doddema
Posts tagged “horizon”
Eltje Doddema
Eltje Doddema
ook op poaden
van pais en vree
tref je onhaail
op de weg
t noodlöt is
onveurspelboar
en slagt tou
zunder overleg
angst veur
onmacht gruit gestoag
bie elke stap
richten horizon
mor wordt t op d’omwegen
n weerloos worsteln
din is t n stried
dij zelden aine won
eltje ©
elke dag is der ain
woarop niks is
wat t liekt
want n lach veur d’ain
is veur d’aander n troan
elke dag is n raais
woar in diggels
de kracht bliekt
om veur n leste kans
toch voluut te goan
ontkennen
waarkt remmend
op veraandern van t heden
bekiek
doarom de toukomst
zunder zörgen om t verleden
eltje ©
noa tieden
van n wankel evenwicht
op n dun koord
van de levensbalans
veraandern
gloeperg doun en loaten
in landerge elementen
zunder glans
talent
zunder passie rakt frustreerd
verdreugt en verdampt
d’inspiroatsiebron
n zuiktocht
vol twievel en onzekerheden
verlegt grìnzen
noar n nije horizon
eltje ©
elk is
op weg
noar d’horizon
langs poaden
dij veur en achter
links en rechts
tougankelk binnen
zuiktochten
noar keuzes
vol doulen
dij vastberoaden
of dolend nomen
gulden middenwegen
wezen kinnen
eltje ©
de zun zakt
d’horizon veurbie
t twijduuster
omaarm k
soamen
mit die
eltje ©
