Posts tagged “hoat

Onbedurven

Onbedurven
drok dounde mit vörmkes
en n schepke speult ze
op heur gemak

aargeloos en zörgeloos
kikt ze over de raand
van de zandbak

zai zugt gain wereld
van twij- en meerdailens
woar aan oordailen
veroordailen veuròf gaait

zai ervoart gain blinde hoat
woarbie t gevuil van
daipgeworrelde vijandschop
veur in agenda’s staait

zai herkent gain noar boeten gerichte
onmacht en frustroatsies
dij veurtkommen uut
rankune en wroak

zai vuilt gain òfkeer
en òfgunst jegens aandern
vanuut d’opvatten
aandermans schuld is d’oorzoak

zai kent gain veuroordailen
en ze vuilt zich
op heur gemak

zai is nait verbitterd
want ze lacht
in de zandbak

eltje ©

Verdaarvelk

Hoat

op zuik
noar de schaaidslienen
tussen mainensvrijhaid
en tolerantsie
infiltreert blinde hoat
t gezond verstand

t is t
filaaine proses
van t stoadegaan
binnendringen van
en t ondermienen deur
n angstvijand

eltje ©

Daip van binnen

Foto: funki1opti

Foto: funki1opti

in t daipste innerlek
van onz’emootsies
bruien gevuilens
van t swaartste kwoad

blieven behuiften
laank onvervuld din
zuiken ze wegen
vol verzengende hoat

haarten blouden din
smereg smaartend
en laaiden tot n
wizze hazzendood

mor

in tieden van
doezenden angsten
kleuren koaken voak nait
van schoamte rood

eltje ©

Verloren generoatsies

Verloren generatie

as je nait over
fouten uut t verleden
hìnstappen kinnen en
dij bruken blieven as
grond veur
tegenstellens en hoat

din heb je as volk
en zien machthebbers
nait t vermogen om
duurzoam te leven in
n vreedzoame
geweldloze stoat

eltje ©

Destruktief

Pro en kontra

in elke uten
van razzenwoan
zit n kiem van
dodelke hoat

as d’uutdroagers zulf
de gevolgen ervoaren
binnen de kondietsies
dezoloat

smeulende resten
gezond verstand
liggen onder t puun
begroaven

achterdocht
en angst regeren
over de ruïnes van
beschoaven

eltje ©

%d bloggers liken dit: