Posts tagged “herdenking

Vrijhaid

Vrijheid

vrijhaid is
n grìnzeloos verlangen
mor teveul lu verdailen
onberekenboar
genoadeloos

vrijhaid wordt
offerd veur belangen
want lu veroordailen
dezastreus
meedogenloos

vrijhaid geft
vredege zunsondergangen
woar lu dailen
zingevend
zörgeloos

vrijhaid brengt
vreugdevolle gezangen
as lu onbeveuroordaild
akkedaaiern
tiedloos

eltje ©

Twij menuten

Dodenherdenking

twij menuten stilte
veur dou
woarin gedachten
spreken

zwiegende herinnerns
steken
deur de ziel van de tied

twij menuten stilte
veur dou
woarin emoties
zuiken

berusten en kwoadhaid
vervluiken mekoar
in n innerlieke stried

twij menuten stilte
veur nou
woarin slachtoffers
zwiegen

n maarkboar taiken
tegen zinloos
geweld

twij menuten stilte
veur mörgen
om veur vrede
te strieden

n zwiegzoam veurnemen
dij veur elk en ain
geldt

eltje ©

%d bloggers liken dit: