Posts tagged “hel

Leegte

Leegte

tiedens de raais
vol toukomstdreumen
brekt de hel
haardvochteg in

ale plannen
veur nou en loater
hebben in t duvelsbos
gain zin

tussen geleuf
en nait geleuven
stridt vaals licht
mit duusternis

tussen begun
en ìndloos droagen
smaart de last
van groot gemis

eltje ©

Aldel

Aldel
aan de monden van
d’eems kropt de duvel
filaain omhoog uut de hel en

snidt as n slachter mit
presizie daibe wonden
in n gezond verdainmodel

slachtovvers binnen
ten dode opschreven in n
troagisch treur- en dubbelspel

woarin de politiek mit
vaalze koarten pokert in
n twijduuster overlevenskarrousel

eltje ©

Nahdaplaain

IMG_1700

blokkerende wrakken
brandende wegen
kreëren n voagevuur
in n hel van hoat

t verminkte verstand
vol machteloze emootsies
bepoalen de weg
van t zinloze kwoad

wankelnd balanserend
over n hail dun koord
overheerst d’ongewishaid
swaalkt n roadeloze road

rusteloze uren
reddeloos verloren
aan t ìnd van de tunnel
komt t licht te loat

Eltje ©
%d bloggers liken dit: