Posts tagged “heden

Horizon

Horizon
elke dag is der ain
woarop niks is
wat t liekt

want n lach veur d’ain
is veur d’aander n troan

elke dag is n raais
woar in diggels
de kracht bliekt

om veur n leste kans
toch voluut te goan

ontkennen
waarkt remmend
op veraandern van t heden

bekiek
doarom de toukomst
zunder zörgen om t verleden

eltje ©

Moalstroom

Moalstroom
t verleden
bepoalt dails
de toukomst dij je
as aarvenis vrijwilleg of
opdrongen nait waaigern kinnen en

dij net as
welvoart en welwezen
as kommuniserende voaten
mit mekoar verbonden binnen

t heden
wordt mit beïnvloud deur
politiek en finansiële maarkten
woaronder perspektieven
meedogenloos bezwieken en

instabiele soamenlevens
wankeln onder wetten
dij rechtveerdegd worden
deur vervoelde statistieken

bewust
of onbewust
speult elk n aigen rol in
manipuloatsie- en verdainmodellen

woarbie

respekt
en transperantsie
onderschikt binnen aan
opgesmukte suksestabellen

eltje ©

Maarktwaarken

Maarktwaarken
aal blindstoarend op
finansiële prikkels
gaait d’infrastruktuur van
onze soamenleven stoadegaan
noar de knoppen

aal privatizerend van
negootsie en dainsten
is de bonuskultuur
van n dikbetoalde manager
nait te stoppen

vrouger
was op de maarkt
n gulden n doalder weerd

op t heden
wordt welwezen doar
stelselmoateg òfwoardeerd

eltje ©

%d bloggers liken dit: