Posts tagged “groot

Mit aandere woorden: Woord

Woord
Ie willen t vervast gain woord hebben, mor ook ie hebben wel ais n verkeerd woord of n woord teveul zegd. t Muitte joe achteròf meschain wel, mor veur je der op verdocht waren, was t hoge woord ter al uut. Ofschoon n goud verstoander mor n haalf woord neudeg het, is t gelukkeg voak zo dat bie lu t mainste t aine oor in en t aandere oor weer uut gaait.

Minder is t as je bekend stoan as n mìns dij n woord het as n hakmes. Je kommen din nait aal te sympathiek over en holden op dij menaaier nait aal te veul vrunden over, omreden je kriegen om d’hoaverklap woorden mit de lu woar je mit omgoan.

Nou wait ik wel dat ter veul te veul lu binnen mit n te groot woord en dat je doarom t hoge woord ter wel ais uutgooien willen. Mor doarmit kom je vast nait in ain joar mit mekoar. Boetendes, ze kinnen ook ja mor beter n goud woord over joe zeggen, nee din? Ik wait wel dat dat nait zo voak gebeurt. Je worden in t aalgemain veul te min prezen. Schiere woorden worden der voak pas over joe zegd as je mit de tonen omhoog liggen. De Hozeveelzen dij vrouger mit negootsie uut t Munsterlaand kwamen, zeden doudestieds ook al dat, as ze zichzulf nait prezen hadden, ze ongeprezen weer tot t laand uut kommen waren. Ze hadden veur dij lu mainsttied gain goud woord over. t Waren ook ja vrumden en dij wuiren wantraauwd en werden nait op heur woord leufd.

Dat is nou ook nog zo, zeggen ie? Wizze lu, wizze. Der binnen tegenwoordeg nog te veul lu dij in dat opzicht de verkeerde woorden uut t woordenbouk bruken. Mor t slimste is, dat dij woorden pazen bie heur gedachten.

Din kin je toch beter mor zo òf en tou n groot woord hebben!

eltje ©

Strategie

Groningen beeft
binnen
belangen groot en
nait tegenstriedeg

en

binnen
tegenstanders stug en
slim partiedeg

din

het elke stried
minder pluzzen
as minnen

as krachten
nait soamenwaarken
en bundeld binnen

eltje ©

Chipt

Chipt
aal meer
van t leven
wordt stiekem registreerd
en as bruukboare data uutlezen

aal dichter
op t vel
leggen sensoren vast
wat privacy hait te wezen

t oog
achter Google Glass
is meedogenloos schaarp
mit kèl grèlle kleuren

n identiteit
wordt gewaitenloos stolen
in n wereld
vol cyberdeuren

om reden
van vaaileghaid en van gemak
willen we vrijhaid wel bepaarken

gevolgen
binnen groot as we t veur aaid verlaizen
en wie dit vuilen en maarken

eltje ©

Belangen

IMG_1641d’eerde waarmt op
ieskappen smelten
duurzoam gruin geft tegengas

lobby’s binnen machteg
belangen slim groot
industrie het n aigen kas

duurzoame dollars
stromen fossiel
aal veur t ekonomisch gewin

dubieuze transaksies
gruiende vermogens
lössloagen van gemainschopszin

strategische schoakels
ontnemen illuzies
konsumenten binnen machteloos

energie vluit vot
koarten binnen schud
schoades schraiwen grìnzenloos

eltje ©

%d bloggers liken dit: