Posts tagged “gronings”
29 juni 2022 Geen reacties

Buurman Jan – keudelkoemke

“Wat zugst ter ja radbroakt uut, kirrel. Hest nait goud sloapen vannacht?” Buurman Jan was aanschoven veur zien kovvie mit kouke en zag der nait hail florizant uut.

“Der is niks mis mit mien sloap, mor volgens mien Griet wel. Ik snurk elke nacht as n modde mit 10 biggen zegt zai. Zai stöt mie elke nacht wel 10 moal wakker. Mor dat is t slimste nait. Zai het zokzulf autodidaktileerd tot sloapdeskundege. Zai wait nou zoveul van sloaperij dat elk heur inhuren kin. Heur adviesburo hait ‘Nust Zacht’ mit n knipoog noar rust zacht. Op heur advies sloap ik nou op mien zied, drink ik soavends gain potje bier meer en heb k mien kopkuzzen omhoog doan.”

“Wat, dien Griet is sloapdeskundege? Hou verzint ze t,” zee ik verboasd.

“Proat mie der nait van,” zee buurman Jan moudeloos. “Ik heur d’haile dag niks aans as verhoalen over sloapholdens. Mien Griet gooit mie der dood mit en ik bin proefkniene. Ik mos gusternacht sloapen in de keunenkleke holden. Volgens heur sloap je din mit n kompleet ontspannen rogholden. En eergusternacht mos k liggen in d’oapholden. Volgens mien Griet slinger je din ontspannen van dreum noar dreum. Kiek sloapen as n meulenwiek was nait meugelk, omreden doar is ons bèrre nait braid genog veur. Doarom mout ik aankommen nacht de flamingoholden uutperbaaiern. Din lig k mit ain bain laankuut en heb k d’aander optrokken. De voude van mien opgetrokken bain ligt din onder de kude van mien aandere bain.”

“Zo, doar most wel goud smui veur wezen. Ast mor gain kramp in de kuten krigst,” zee k gnivvelnd.

“Man, k zai nou al tegen de nacht op,” zee buurman Jan en hai klonk slim delesloagen. “Mor dat is t slimste nait. Mien Griet verkocht ter ook nog kuzzens bie, want mit n goie kuzzen veurkom je dat je snachts aal wakker worden deurdat je vanwege piene in de nekke of in de kop nait in sloap kommen. Heur anti-snurk kuzzens binnen vuld mit hailzoame boukwaidedoppen mengd mit linksomgedraaide dummiekörrels. Omdat je doarop goud uutrusten krieg je ook gain last meer van zeubranden, navvelsoezen, hoge blouddruk, zinkens in de knijen, wintervouten en braaiaarms. Mor kom, ik goa weer noar mien Griet. Ik mout heur helpen mit t vullen van heur kuzzens. Zai rekent op n verkoopsukses! Tjeu.”

Ik docht: t is mor te hopen dat hai vannacht gain sloap in t bain krigt. Mien òl opoe roadde mie vrouger aan dat, as k nait sloapen kon en de nacht dus wat kört was, ik mit mien doemen in d’haand sloapen goan mos. Din sluip ik wel vief ketaaier in t uur en wer k de volgende mörgen aal flòitpiepend as n keudeldoemke wakker.

As n keudeldoemke? Inderdoad, en dat is gain vogeltje op ain bain….
26 juni 2022 Geen reacties

Dodenrad

Je zollen mor 73 wezen, lu. Dus net in de 70 en achteruutkiekend op roem 40 joar kraben en knooien. Genotternd van joen verdainde rust en sinds n dag of wat uut de kedde omdat je der, as pensionado, ìndelk ains wat eurootjes biekriegen. Doarbie ook al n joar of wat op AOW en dus aal mit aal de tied van joen leven. Frank en vrij elke dag tuutjefloitend op weg noar de 75 en nog veul wieder.

75 en nog veul wieder?

Der zol joe op n dag mor n ploug kloetjefietsers veurbie snittern. Lu dij veul te stoef achter mekoar rieden en dij aal roggelnd, koggelnd, houstend en spijend en mit n kop as n bolle heur hobby bedrieven. Lu dij zok in strak-om-de-pokkel lycrapakjes in t swait joagen. Man, doar zol mor n fietsterrorist tussen zitten: aine dij joe, as eervolle 70-pluzzer, zunder pardon zo mor van de zokken ridt woardeur je in t zaikenhuus belanden. Din hejje n perbleem as doar op boazes van joen leeftied beslist wordt of je wel of nait holpen worden. Joen leeftied kin din zomor joen doodvonnis worden. Dus niks op noar de 75 en verder.

t Zit ter traauwens dik in dat ter op termien nog veul meer kriteria biekommen, zodat ter nog meer boeten de zörgboot valen. Wat docht je van platjelopers, swieneputen, antammen, maalhibbels, eelske medden en zoesklötten? Wat zeggen ie? Fantasten nait vergeten?

Ach, meschain draaien ze veur dij nog even aan t rad van oaventuur. Dat krigt din vast as bienoam ‘Dodenrad’.
25 juni 2022 Geen reacties

Buurman Jan – vergees

“Wie goan dit joar nait op vekansie. t Is overaal ja smoordrok, man. In vertrekhallen van vlaigvelden mout je tegenwoordeg ook al nait wezen. n Mieghommelnust is der niks bie. En op fietspoaden binnen ook overaal files. Nee, wie blieven lekker thuus, mien Griet en ik. Op t prikbord bie Berend Bongel zien Super hebben wie ons aanprezen as ‘kontainerkoppel’. Das n begrip dij ikzulf opbedocht heb. Wie zetten de kontainers van lu dij op vekansie binnen veur heur huus en weerom en wie letten op de toene. De mainste lu goan ja mit volle kontainers vot. Wie zörgen derveur dat ze leegd worden. En as extroa service hollen wie de grasrobotmaaiers ook in de goaten. Kiek, in dizze tied mout je joe sosioal opstèllen. Veul lu waiten ja nait meer wat dat is. Mor wie wel.”

“Zo, dat is nait mis,” zee ik.

“Inderdoad,” ging buurman Jan verder. “Wie hebben hail wat responzen kregen. Zo nuim je dat as lu reageren. En t mooie is dat wie de vruchten en de gruinten van de vekansiegangers veur onszulf oogsten. Dat zit in t kontrakt om t zomor ains te zeggen. Zo’n ‘kontrakt’ sloeten wie din ook allìnt òf mit lu dij n gruintetoene hebben.”

“Tou mor, en dat in de tied van aarten, bonen, praai, temoaten, komkommers…..”

“En bloumkolen, spinoazie, melounen, siepels, nuim mor op,” vulde buurman Jan aan. “Zo hebben wie de kommende 3 moanden de beschikken over d’opbrengst van 17 toentjes. n Kwestie van plannen en loos wezen. Mien Griet en ik kinnen de kommende moanden in wezen elke dag vrij dikkedakken. En wat ter over is wecken wie in of doun we in diepvries. Onze vekansietied is dus zo goud as vergees. En as t schier weer is zuiken wie, as baarmtoeristen, n stee op woar veul te zain is. Dat kost ons ook niks. Mörgen zitten wie langs de N33 te kieken noar aal dij TT-gangers. Mien Griet trekt ons thee van de muntplanten van Tinus Dontje en onze toetjes moaken wie vanoavend alvast kloar mit rebaarberplanten van Jan Snorre. Zo’n dag kost ons dus ainglieks ook niks.

Mor goud, ik goa weer noar mien Griet. Ik hoal nog even wat sloakroppen uut de toene van Tammo en Dientje Tepper dij op dit mement verzoepen op n camping in Noorwegen. Mien Griet moakt ter dammeet n gruingerecht van en dij mommeln wie mörgen lekker mit ons baaident op. Tjeu!”

En vot was buurman Jan. Hai en zien Griet haren t loos bekeken, omreden Jan en Alleman wollen noa de Coronatied de wiede wereld weer in. t Kost n poar sìnten mor din hejje ook wat.

Alhouwel: t bliekt wel dat, as je loos binnen, n vekansie sikkom niks kosten huft…..
24 juni 2022 Geen reacties

Buurman Jan – vaalze kraaie.

“Most ais kieken wat ik op mien telefoon heb. n Appke, moakt deur de zeun van Jan Hak, mien kapper. Waist wel ja, de zeun van òl Doantje Hak. Dij nuimden ze vrouger ook wel Doantje Hak-aal-hak, omreden as je doar votkwamen din was t hoar slim ongeliek knipt. Mor as Doantje doar din kommentaar op kreeg din zee e aaltied dat hai in Paries op kurzus wèst was en dat hai knipde volgens de lèste trend. Tja, en wèl wil der nou nait nijmoods bielopen. Traauwens: zien zeun Jan nuimen ze doarom aaltied ‘Jan Hakseloar’.”

“Ik neem aan dast gain hakken uut de koezen hest en dat de smoak van n kop kovvie mit kouke die t gevuil geft dat ter n engeltje over dien tonge migt,” zee ik.

“Der is niks mis mit mien koezen,” zee buurman Jan. “Schenk mor in. Mor goud, Jan Hak zien zeun dus het n app ontworpen woarmit je aan d’haand van de zang bepoalen kinnen welke vogels t binnen. Ik heb t al even perbaaierd bie ons achter in toene. In t begun ging t meroakel. t Bleek dat mien appje n keudeldoempke, n huusmuske en n holtdoeve detoniseerde.”

“Registreerde,” zee ik.

“Dat zee ik,” ging buurman Jan verder. “Ik heurde ook n merel, n sprutter en n boomkroepertje. Mor dou ruip mien Griet mie en ik zag op mien schaarmke dat doar dou ‘Blinde Vinke’ ston. Nou, doe kinst mien Griet. As zai dat gewoar worden was haar k de board der òfkregen. Volgens mie zit ter din ook n fout in dij app. Doarom goa k der even weer mit hìn.”

“Dat liekt mie n goud plan,” zee ik. “Aal dij nijmoodse fratsen binnen schier, mor je mouten der wel op vertraauwen kinnen. Aans hejje zo hikhakkerij.”

“Zo is dat,” zee buurman Jan. “Ik mout ter nait aan denken as dij app bie t heuren van de stem van mien Griet aangeft dat t n ‘Wulpse Krakeend’ is. Man, din is de wereld te klaain. Kom, ik goa even noar Jan Hak. Tjeu!”

En vot was hai. Ik stelde mie t al veur: buurman Jan demonstreert zien app aan zien kwedelnde Griet en dij las op t schaarmke:

‘Vaalze Kraaie’…….
22 juni 2022 Geen reacties

Buurman Jan – verteren

“Dou mie mor n kop kovvie mit kouke. Doar is niks mis mit. Dat vaalt ter elk moal weer goud in. Der is in ons laand aanswat genog wat gain poggen lieden kin. t Gaait overaal as n kousteert noar beneden. Mien òl opoe veurspèlde dat vrouger al. Zai zee dat de daarde noa-oorlogse generoatsie de boudel opvreten zol omdat dij de weelde nait meer droagen kon.”

“Dat heur je wel voaker,” zee ik. “d’Eerste generoatsie knooit zok dood, de twijde baauwt t nog wat verder op mor de daarde gaait failliet.”

“Doar zegst wat,” zee buurman Jan. “Kiek, as je nait leren dat t verleden der nait veur niks wèst is din wordt joen toukomst n duuster gat. Ik las dat zulfs de Chineze restaurants al in de perblemen kommen omdat ze gain koks meer kriegen kinnen. Dammeet is der gain babie pangang en tjappie tjoi meer te koop. Nou, din is t wel hail slim stèld. mit dit laand zeg ik die. Guster trof ik Jannes Libbe nog. Dij was der ook kloar mit. Dij was op weg noar Geert Pompie om te protesteren tegen zien veul te dure beziene. En Hinderk Havvel was foek omdat hai koarten kocht haar veur FestiValderAa dat meschain nait deurgoan zol vanwege protesterende buurtbewoners. Man, elk rebuliet d’aandern ja de mizère in. In wat veur n wereld leven wie ainglieks.

Kom, ik goa mor weer noar mien Griet. Ik mout nog wat kezeblokjes snibbeln. Wie goan vannommerdag bie ons boetendeure zitten omreden terrazzen van kefees en restaurants worden onbetoalboare geneugten. n Pot bier gaait doar 7 euro kosten heb k heurd. Man, dat is ja omrekend 15 gulden. Dat is toch gewoon bie de wilde knorhoanen òf. Doar krieg je ja n male smoak van in de mond. Mit zokse priezen kin je t bier nait meer normoal opdrinken. Je mouten joen tonge der even inhangen, vot weer optrekken en din derop sabbeln zodat je laank van de smoak genottern kinnen. Nou tjeu!”

Buurman Jan ging noar zien Griet om der mit heur baaident n gezellege, mor veuraal betoalboare middag van te moaken. Ze konnen t zok nou ja nog veroorloven.

Mien ol opoe zee vrouger al:

Goa nait veur loater rezerveren, t binnen d’aarfgenoamen dij din joen pot verteren.
19 juni 2022 Geen reacties

Buurman Jan – Snöt en kwiele

“Wat is t toch n boudel nait? Elke dag weer bliekt dat ter op onze oardkloot vrumde kostgangers ronddolen. Zulfs in de locht binnen der lu dij t benul goud in toeze hebben. Per joar schienen n lutje doezend passagiers veur overlast te zörgen.”

Buurman Jan haar de stoule nog nait ains waarm of hai was nog veur d’eerste slok kovvie al van wale stoken.

“Waist wel woar dat van komt? Van voetbal. Onderzuik het uutwezen dat je deur t koppen joen hazzens beschoadegen kinnen. En wel dusdoaneg dat joen geheugen doar loater slim van te lieden het. t Is doarom ook ja nait roar dat aal meer lu de wereld aankieken veur n doedelzak. Sommegen schienen zulfs op jonge leeftied al in oapen te muteren. Heur klimgedrag kin je wekelks bewondern in en rond de voetbalvelden.”

“Inderdoad,” zee ik. “t Is soms bie de baisten òf.”

“Dat zee ik,” vervolgde buurman Jan. “Din hejje ook nog de kategorie aandachtstrekkers. Lu dij der alles aan doun om op te valen en in t nijs te kommen. Dat volk blinkt uut in negatief gedrag. Desondanks besteden de media der veul tied en ruumte aan. Dörmse twijbainers kriegen zo bekìndhaid. De media denkt dat normoale lu doar op zitten te wachten. Nou, ik kin dij slagroomtoartsmieter, dij de Mona Lisa verhinneweren wol, wel missen as koespiene. Mor nee hor, zo’n haalfwieze komt prominent in t nijs. In wezen is t netuurlek bedruifd dat veur veul lu dizze idioterie amuzement is. Ze deurzain bliekboar nait dat ze aal emo-hunkernd versloafd roakt binnen aan snöt-en-kwiele-tv. Kom, ik goa noar mien Griet. Dij was net ook aan t snöttern. Ze was siepels aan t snibbeln veur n prane hachee. Tjeu.”

Buurman Jan haar toch wel n slim realistische kiek op de emootsionele toustand van de mìnshaid. Quasimodo was der doudestieds hail aans langskommen. Bie hom was der sproake van echte tragiek. Doarbie kwam ook nog ains dat hai van dichtbie de klokken luden heurde en dat hai zeker wos woar de klepels hongen…….
18 juni 2022 Geen reacties

Buurman Jan – òlwieven

“Mor goud dast zunnepanelen op dak hest. Din kinst nog veur nait aal teveul stroomkosten kovvie zetten. Stroom wordt zo stoadegaan ja n luxeartikel.”

“Dat is woar”, zee ik, “mor de pries van kovviebonen heft t veurdail weer op.”

“Inderdoad”, antwoordde buurman Jan, “alles is op t heden aldernoarst duur. Ik duurf hoast nait meer om bosschop goan, omreden ik bin bange dat ik op ain bain weerom kom. Ze trekken joe ja overaal n pode uut, man. As je teminste bie de kassa aan de beurt kommen. Der schienen winkels te wezen woar ze n keuvelkassa inricht hebben. Zulfscanvertuten waren der al, mor zo’n keuvelkassa is nij. Doar kinnen klanten, dij t teraan tou hebben, even gezelleg leutern en kleppen. Man, ik aarger mie nou al aan aal dij kovviedrinkers dij mit heur bekertjes vol kovvie de gangpoaden onvaaileg moaken. En nou komt ter ook nog n hangstee bie. Dat worden doar vast en zeker geregeld opstoppens. Lange riegen karen dij hìnter en twìnter de deurgang blokkeren mit doarnoast n oploop van veuraal òllen dij uutgebraaid zemeln over heur zaiktes en ontberens.”

“Doar zegst wat. Wolst ter ook n hombe òlwieven kouke bie? Dat heb k guster touvalleg veur de veraandern ains n maol mitnomen.”

“Doar spij k nait op. Lekker,” zee buurman Jan. “Ik vroag mie traauwens òf hou laank dat onder dij noam nog in de winkels ligt. Wie maggen van gelok spreken dat t in de Raandstad nait bekìnd is, aans was der vast wel al n gemankeerde wèst dij ‘òlwieven’ slim minachtend en diskriminerend vinden zol richten t vraauwvolk. Kom ik goa weer noar mien Griet. Dij wil dammeet boeten eten. Zai het noamelk twij rotoatormeulentjes kocht. Dij kin je op toavel zetten en ze draaien, as t goud is, as n tierelier. Din kommen der gain wepen en schietmuggen op joen eterij. Tjeu!”

Buurman Jan haar zien snee òlwieven vlot op. t Zol mie benijen of hai aankommen weke ook mit òlwievenijs komt……
14 juni 2022 Geen reacties

Pompkederij

t Bliekt dat veul lu tegenwoordeg van de wind leven kinnen. Aandern binnen doarentegen overleverd aan de grillen van schietpotten en windboelen. Zo het onze regeren t plan lanseerd om ons verplicht brompompen in de moage te splitsen. Dij pompen worden ons as vergruinwonders aanprezen. t Doul is ook om binnen 10 joar 2,5 miljoun wonens te izoleren. t Kin dus mor zo wezen dat ter op n dag n vrumde Frans of Fransien bie joe veur de deure staait en joe opdragt om t vergruinensproses binnen n joar òf te ronden. Je kriegen as goudmoakertje nog n pompschroevendraaier kedo om de kosten van t òfkoppeln van joen olle apperatuur wat te drokken, omreden instelateurs kommen nait meer veur 25 euro in t uur.

k Heb heurd dat ter veur dizze put veul ex-bezinepompholders omschould worden. As tanken aan de pompen n vermogen kost en t gewone volk zien stoalen ros nait meer vouern kin din is t ja gaauw beurd mit heur tankstations. Dus is der binnenkört volk zat om joe op te droagen de normeren (dat is t nije synoniem veur verplichten) in gang te zetten. Dij pompaansmeerders priezen joe prachtege, of zo as zai t zulf nuimen, pompeuze waarmtepompbolides aan. Of je doar bliede mit wezen mouten? Tja, aal wat pompeus is is in wezen overdreven schier. Hoogdroavend. Of te wel: te staark aanzet.

Ach, je kinnen aaltied nog zeggen: loop noar de pomp en bind joen 24 ponds pompernikkel mor op joen rogge. Mor ik bin bange dat je din aan t körtste ìnde trekken.

Hou din ook: pomkebloaden bie mie in de viever kommen elk joar weer vannijs gruin teveurschien. t Wotter is noamelk al joaren schoon en glashelder.

En t schierste is: dizze pompkederij kost niks……

%d bloggers liken dit: