Posts tagged “graaien

Hompen

“Dij blift ja toch tot t leste liggen, juf.” Eppo keek heur mit schoapachtege ogen aan en huil in zien rechterhaand n dik stók keze. Der waren al n poar kinder veur hom aan west en dij haren, zo as heur dat leerd was, de dikste hombe liggen loaten. Zien juf haar hom doarover aansproken, mor Eppo zien weerwoord was dudelk. As hai t leste aan de beurt west was haar e t dikste eksemploar ook had, zee hai. “En mien opoe zegt aaltied: De lozen en de gladden hebben ze zomor nait bie de kladden.” Eppo wos op jonge leeftied al hou de wereld in mekoar zit.

Dit kaberet aanschaauwde k joaren leden tiedens n klazzebezuik. En ik mos hieraan denken dou k las dat Booking Holding (bekìnd van Booking.com) zien bobo’s veur n bedrag van rond de 28 miljoun euro aan bonuzzen uutkeren wil. Veurnoamelk in aandailen, mor dat even terziede. Alhouwel, gladde beurssnokkels waiten doar wel road mit. Geld schit op bulten ja. Ook t personeel schient wat te kriegen, mor vergeleken mit de kabbe geld van de “toppers” zal t wel n schoamel bedrag wezen.

Voak is t zo dat je in t bedriefsleven geld kriegen (“verdainen” zeggen doar) as de zoaken goud goan. Mor deur corona was t bie heur t òfgelopen joar gain vetpot. t Was doar min of meer legedeuzenwaark west. Of in heur geval: n raaisgat. En t was bie t gat òf of ze t ainglieks redden zollen. Doarom huilen ze d’haand op bie onze stoat en ontsluigen ze veul personeel. Desondanks (of doarom) kregen ze 64 miljoun euro aan steun. Geld van joe en mie! Mor t bliekt wel: veur heur is t gain kostwinnen, mor geld winnen.

Der is in wezen gain sproake van n “prestoatsie”bonus. Mor de Bookingbobo’s willen geern op onze kosten dikdoun rond de vleespotten van Egypte. Doar zitten din netuurlek wel de toptalenten mit aldernoarst veul laaiderschop. Ze willen ja d’uutstroalen hebben van n bedrief woar lu geern waarken willen.

Ik trof lestdoags op n verjoardag aine dij bie Booking waarkde. Eppo was zien noam.

Loat dij nou net de grootste hombe toarde veur mien neuze votgraaien…….

Bankenmaffia

Bankenmaffia

ongelimiteerd
plokken en roven
as roaven
is deur lösgesloagen lu
tot kultuur verheven

t zulfverriekend
grabbeln en graaien
as daiven
is n aldernoarste minachten
van de soamenleven

immoreel
is heur handeln en
t normbesef is blind en doof

de bankentop
stinkt en kreëert zo
n haile gevoarleke kloof

eltje ©

Vergoan

Vergoan
verloaten
staait n roltrap
zunder stroom
mìnsenloos stil
as symbool van
wat ains welvoart was

vergoan
binnen de treden
dij broenrosteg
in t duuster votzinken
as taiken van
n dekadent moeras

t is de tol
dij betoald worden mout
veur t grìnzeloze graaien

mor t leed
gaait mainsttied ver veurbie
aan de lozen en de gaaien

eltje ©

%d bloggers liken dit: